اليونانية والعبرية الكتاب المقدس
1 CHRONICLES 15

1Ch 15:1
ויעשׂ לו בתים בעיר דויד ויכן מקום לארון האלהים ויט לו אהל׃
1Ch 15:2
אז אמר דויד לא לשׂאת את ארון האלהים כי אם הלוים כי בם בחר יהוה לשׂאת את ארון יהוה ולשׁרתו עד עולם׃
1Ch 15:3
ויקהל דויד את כל ישׂראל אל ירושׁלם להעלות את ארון יהוה אל מקומו אשׁר הכין׃
1Ch 15:4
ויאסף דויד את בני אהרן ואת הלוים׃
1Ch 15:5
לבני קהת אוריאל השׂר ואחיו מאה ועשׂרים׃
1Ch 15:6
לבני מררי עשׂיה השׂר ואחיו מאתים ועשׂרים׃
1Ch 15:7
לבני גרשׁום יואל השׂר ואחיו מאה ושׁלשׁים׃
1Ch 15:8
לבני אליצפן שׁמעיה השׂר ואחיו מאתים׃
1Ch 15:9
לבני חברון אליאל השׂר ואחיו שׁמונים׃
1Ch 15:10
לבני עזיאל עמינדב השׂר ואחיו מאה ושׁנים עשׂר׃
1Ch 15:11
ויקרא דויד לצדוק ולאביתר הכהנים וללוים לאוריאל עשׂיה ויואל שׁמעיה ואליאל ועמינדב׃
1Ch 15:12
ויאמר להם אתם ראשׁי האבות ללוים התקדשׁו אתם ואחיכם והעליתם את ארון יהוה אלהי ישׂראל אל הכינותי׃
1Ch 15:13
כי למבראשׁונה לא אתם פרץ יהוה אלהינו בנו כי לא דרשׁנהו כמשׁפט׃
1Ch 15:14
ויתקדשׁו הכהנים והלוים להעלות את ארון יהוה אלהי ישׂראל׃
1Ch 15:15
וישׂאו בני הלוים את ארון האלהים כאשׁר צוה משׁה כדבר יהוה בכתפם במטות עליהם׃
1Ch 15:16
ויאמר דויד לשׂרי הלוים להעמיד את אחיהם המשׁררים בכלי שׁיר נבלים וכנרות ומצלתים משׁמיעים להרים בקול לשׂמחה׃
1Ch 15:17
ויעמידו הלוים את הימן בן יואל ומן אחיו אסף בן ברכיהו ומן בני מררי אחיהם איתן בן קושׁיהו׃
1Ch 15:18
ועמהם אחיהם המשׁנים זכריהו בן ויעזיאל ושׁמירמות ויחיאל ועני אליאב ובניהו ומעשׂיהו ומתתיהו ואליפלהו ומקניהו ועבד אדם ויעיאל השׁערים׃
1Ch 15:19
והמשׁררים הימן אסף ואיתן במצלתים נחשׁת להשׁמיע׃
1Ch 15:20
וזכריה ועזיאל ושׁמירמות ויחיאל ועני ואליאב ומעשׂיהו ובניהו בנבלים על עלמות׃
1Ch 15:21
ומתתיהו ואליפלהו ומקניהו ועבד אדם ויעיאל ועזזיהו בכנרות על השׁמינית לנצח׃
1Ch 15:22
וכנניהו שׂר הלוים במשׂא יסר במשׂא כי מבין הוא׃
1Ch 15:23
וברכיה ואלקנה שׁערים לארון׃
1Ch 15:24
ושׁבניהו ויושׁפט ונתנאל ועמשׂי וזכריהו ובניהו ואליעזר הכהנים מחצצרים בחצצרות לפני ארון האלהים ועבד אדם ויחיה שׁערים לארון׃
1Ch 15:25
ויהי דויד וזקני ישׂראל ושׂרי האלפים ההלכים להעלות את ארון ברית יהוה מן בית עבד אדם בשׂמחה׃
1Ch 15:26
ויהי בעזר האלהים את הלוים נשׂאי ארון ברית יהוה ויזבחו שׁבעה פרים ושׁבעה אילים׃
1Ch 15:27
ודויד מכרבל במעיל בוץ וכל הלוים הנשׂאים את הארון והמשׁררים וכנניה השׂר המשׂא המשׁררים ועל דויד אפוד בד׃
1Ch 15:28
וכל ישׂראל מעלים את ארון ברית יהוה בתרועה ובקול שׁופר ובחצצרות ובמצלתים משׁמעים בנבלים וכנרות׃
1Ch 15:29
ויהי ארון ברית יהוה בא עד עיר דויד ומיכל בת שׁאול נשׁקפה בעד החלון ותרא את המלך דויד מרקד ומשׂחק ותבז לו בלבה׃

تابِع بَنْد - بشارة بَيَان