اليونانية والعبرية الكتاب المقدس
ISAIAH 42

Isa 42:1
הן עבדי אתמך בו בחירי רצתה נפשׁי נתתי רוחי עליו משׁפט לגוים יוציא׃
Isa 42:2
לא יצעק ולא ישׂא ולא ישׁמיע בחוץ קולו׃
Isa 42:3
קנה רצוץ לא ישׁבור ופשׁתה כהה לא יכבנה לאמת יוציא משׁפט׃
Isa 42:4
לא יכהה ולא ירוץ עד ישׂים בארץ משׁפט ולתורתו איים ייחילו׃
Isa 42:5
כה אמר האל יהוה בורא השׁמים ונוטיהם רקע הארץ וצאצאיה נתן נשׁמה לעם עליה ורוח להלכים׃
Isa 42:6
אני יהוה קראתיך בצדק ואחזק בידך ואצרך ואתנך לברית עם לאור גוים׃
Isa 42:7
לפקח עינים עורות להוציא ממסגר אסיר מבית כלא ישׁבי חשׁך׃
Isa 42:8
אני יהוה הוא שׁמי וכבודי לאחר לא אתן ותהלתי לפסילים׃
Isa 42:9
הראשׁנות הנה באו וחדשׁות אני מגיד בטרם תצמחנה אשׁמיע אתכם׃
Isa 42:10
שׁירו ליהוה שׁיר חדשׁ תהלתו מקצה הארץ יורדי הים ומלאו איים וישׁביהם׃
Isa 42:11
ישׂאו מדבר ועריו חצרים תשׁב קדר ירנו ישׁבי סלע מראשׁ הרים יצוחו׃
Isa 42:12
ישׂימו ליהוה כבוד ותהלתו באיים יגידו׃
Isa 42:13
יהוה כגבור יצא כאישׁ מלחמות יעיר קנאה יריע אף יצריח על איביו יתגבר׃
Isa 42:14
החשׁיתי מעולם אחרישׁ אתאפק כיולדה אפעה אשׁם ואשׁאף יחד׃
Isa 42:15
אחריב הרים וגבעות וכל עשׂבם אובישׁ ושׂמתי נהרות לאיים ואגמים אובישׁ׃
Isa 42:16
והולכתי עורים בדרך לא ידעו בנתיבות לא ידעו אדריכם אשׂים מחשׁך לפניהם לאור ומעקשׁים למישׁור אלה הדברים עשׂיתם ולא עזבתים׃
Isa 42:17
נסגו אחור יבשׁו בשׁת הבטחים בפסל האמרים למסכה אתם אלהינו׃
Isa 42:18
החרשׁים שׁמעו והעורים הביטו לראות׃
Isa 42:19
מי עור כי אם עבדי וחרשׁ כמלאכי אשׁלח מי עור כמשׁלם ועור כעבד יהוה׃
Isa 42:20
ראית רבות ולא תשׁמר פקוח אזנים ולא ישׁמע׃
Isa 42:21
יהוה חפץ למען צדקו יגדיל תורה ויאדיר׃
Isa 42:22
והוא עם בזוז ושׁסוי הפח בחורים כלם ובבתי כלאים החבאו היו לבז ואין מציל משׁסה ואין אמר השׁב׃
Isa 42:23
מי בכם יאזין זאת יקשׁב וישׁמע לאחור׃
Isa 42:24
מי נתן למשׁוסה יעקב וישׂראל לבזזים הלוא יהוה זו חטאנו לו ולא אבו בדרכיו הלוך ולא שׁמעו בתורתו׃
Isa 42:25
וישׁפך עליו חמה אפו ועזוז מלחמה ותלהטהו מסביב ולא ידע ותבער בו ולא ישׂים על לב׃

تابِع بَنْد - بشارة بَيَان