| |  |
  Gen 4:1
והאדם ידע את חוה אשׁתו ותהר ותלד את קין ותאמר קניתי אישׁ את יהוה׃
Gen 4:2
ותסף ללדת את אחיו את הבל ויהי הבל רעה צאן וקין היה עבד אדמה׃
Gen 4:3
ויהי מקץ ימים ויבא קין מפרי האדמה מנחה ליהוה׃
Gen 4:4
והבל הביא גם הוא מבכרות צאנו ומחלבהן וישׁע יהוה אל הבל ואל מנחתו׃
Gen 4:5
ואל קין ואל מנחתו לא שׁעה ויחר לקין מאד ויפלו פניו׃
Gen 4:6
ויאמר יהוה אל קין למה חרה לך ולמה נפלו פניך׃
Gen 4:7
הלוא אם תיטיב שׂאת ואם לא תיטיב לפתח חטאת רבץ ואליך תשׁוקתו ואתה תמשׁל׃
Gen 4:8
ויאמר קין אל הבל אחיו ויהי בהיותם בשׂדה ויקם קין אל הבל אחיו ויהרגהו׃
Gen 4:9
ויאמר יהוה אל קין אי הבל אחיך ויאמר לא ידעתי השׁמר אחי אנכי׃
Gen 4:10
ויאמר מה עשׂית קול דמי אחיך צעקים אלי מן האדמה׃
Gen 4:11
ועתה ארור אתה מן האדמה אשׁר פצתה את פיה לקחת את דמי אחיך מידך׃
Gen 4:12
כי תעבד את האדמה לא תסף תת כחה לך נע ונד תהיה בארץ׃
Gen 4:13
ויאמר קין אל יהוה גדול עוני מנשׂוא׃
Gen 4:14
הן גרשׁת אתי היום מעל פני האדמה ומפניך אסתר והייתי נע ונד בארץ והיה כל מצאי יהרגני׃
Gen 4:15
ויאמר לו יהוה לכן כל הרג קין שׁבעתים יקם וישׂם יהוה לקין אות לבלתי הכות אתו כל מצאו׃
Gen 4:16
ויצא קין מלפני יהוה וישׁב בארץ נוד קדמת עדן׃
Gen 4:17
וידע קין את אשׁתו ותהר ותלד את חנוך ויהי בנה עיר ויקרא שׁם העיר כשׁם בנו חנוך׃
Gen 4:18
ויולד לחנוך את עירד ועירד ילד את מחויאל ומחייאל ילד את מתושׁאל ומתושׁאל ילד את למך׃
Gen 4:19
ויקח לו למך שׁתי נשׁים שׁם האחת עדה ושׁם השׁנית צלה׃
Gen 4:20
ותלד עדה את יבל הוא היה אבי ישׁב אהל ומקנה׃
Gen 4:21
ושׁם אחיו יובל הוא היה אבי כל תפשׂ כנור ועוגב׃
Gen 4:22
וצלה גם הוא ילדה את תובל קין לטשׁ כל חרשׁ נחשׁת וברזל ואחות תובל קין נעמה׃
Gen 4:23
ויאמר למך לנשׁיו עדה וצלה שׁמען קולי נשׁי למך האזנה אמרתי כי אישׁ הרגתי לפצעי וילד לחברתי׃
Gen 4:24
כי שׁבעתים יקם קין ולמך שׁבעים ושׁבעה׃
Gen 4:25
וידע אדם עוד את אשׁתו ותלד בן ותקרא את שׁמו שׁת כי שׁת לי אלהים זרע אחר תחת הבל כי הרגו קין׃
Gen 4:26
ולשׁת גם הוא ילד בן ויקרא את שׁמו אנושׁ אז הוחל לקרא בשׁם יהוה׃
СЛЕДУЮЩАЯ ГЛАВА - ИНДЕКС БИБЛИИ И ПОИСК
|
