| |  |
  Pro 17:1
טוב פת חרבה ושׁלוה בה מבית מלא זבחי ריב׃
Pro 17:2
עבד משׂכיל ימשׁל בבן מבישׁ ובתוך אחים יחלק נחלה׃
Pro 17:3
מצרף לכסף וכור לזהב ובחן לבות יהוה׃
Pro 17:4
מרע מקשׁיב על שׂפת און שׁקר מזין על לשׁון הות׃
Pro 17:5
לעג לרשׁ חרף עשׂהו שׂמח לאיד לא ינקה׃
Pro 17:6
עטרת זקנים בני בנים ותפארת בנים אבותם׃
Pro 17:7
לא נאוה לנבל שׂפת יתר אף כי לנדיב שׂפת שׁקר׃
Pro 17:8
אבן חן השׁחד בעיני בעליו אל כל אשׁר יפנה ישׂכיל׃
Pro 17:9
מכסה פשׁע מבקשׁ אהבה ושׁנה בדבר מפריד אלוף׃
Pro 17:10
תחת גערה במבין מהכות כסיל מאה׃
Pro 17:11
אך מרי יבקשׁ רע ומלאך אכזרי ישׁלח׃
Pro 17:12
פגושׁ דב שׁכול באישׁ ואל כסיל באולתו׃
Pro 17:13
משׁיב רעה תחת טובה לא תמישׁ רעה מביתו׃
Pro 17:14
פוטר מים ראשׁית מדון ולפני התגלע הריב נטושׁ׃
Pro 17:15
מצדיק רשׁע ומרשׁיע צדיק תועבת יהוה גם שׁניהם׃
Pro 17:16
למה זה מחיר ביד כסיל לקנות חכמה ולב אין׃
Pro 17:17
בכל עת אהב הרע ואח לצרה יולד׃
Pro 17:18
אדם חסר לב תוקע כף ערב ערבה לפני רעהו׃
Pro 17:19
אהב פשׁע אהב מצה מגביה פתחו מבקשׁ שׁבר׃
Pro 17:20
עקשׁ לב לא ימצא טוב ונהפך בלשׁונו יפול ברעה׃
Pro 17:21
ילד כסיל לתוגה לו ולא ישׂמח אבי נבל׃
Pro 17:22
לב שׂמח ייטב גהה ורוח נכאה תיבשׁ גרם׃
Pro 17:23
שׁחד מחיק רשׁע יקח להטות ארחות משׁפט׃
Pro 17:24
את פני מבין חכמה ועיני כסיל בקצה ארץ׃
Pro 17:25
כעס לאביו בן כסיל וממר ליולדתו׃
Pro 17:26
גם ענושׁ לצדיק לא טוב להכות נדיבים על ישׁר׃
Pro 17:27
חושׂך אמריו יודע דעת וקר רוח אישׁ תבונה׃
Pro 17:28
גם אויל מחרישׁ חכם יחשׁב אטם שׂפתיו נבון׃
СЛЕДУЮЩАЯ ГЛАВА - ИНДЕКС БИБЛИИ И ПОИСК
|
