| |  |
  Rth 4:1
ובעז עלה השׁער וישׁב שׁם והנה הגאל עבר אשׁר דבר בעז ויאמר סורה שׁבה פה פלני אלמני ויסר וישׁב׃
Rth 4:2
ויקח עשׂרה אנשׁים מזקני העיר ויאמר שׁבו פה וישׁבו׃
Rth 4:3
ויאמר לגאל חלקת השׂדה אשׁר לאחינו לאלימלך מכרה נעמי השׁבה משׂדה מואב׃
Rth 4:4
ואני אמרתי אגלה אזנך לאמר קנה נגד הישׁבים ונגד זקני עמי אם תגאל גאל ואם לא יגאל הגידה לי ואדע כי אין זולתך לגאול ואנכי אחריך ויאמר אנכי אגאל׃
Rth 4:5
ויאמר בעז ביום קנותך השׂדה מיד נעמי ומאת רות המואביה אשׁת המת קניתי להקים שׁם המת על נחלתו׃
Rth 4:6
ויאמר הגאל לא אוכל לגאול לי פן אשׁחית את נחלתי גאל לך אתה את גאלתי כי לא אוכל לגאל׃
Rth 4:7
וזאת לפנים בישׂראל על הגאולה ועל התמורה לקים כל דבר שׁלף אישׁ נעלו ונתן לרעהו וזאת התעודה בישׂראל׃
Rth 4:8
ויאמר הגאל לבעז קנה לך וישׁלף נעלו׃
Rth 4:9
ויאמר בעז לזקנים וכל העם עדים אתם היום כי קניתי את כל אשׁר לאלימלך ואת כל אשׁר לכליון ומחלון מיד נעמי׃
Rth 4:10
וגם את רות המאביה אשׁת מחלון קניתי לי לאשׁה להקים שׁם המת על נחלתו ולא יכרת שׁם המת מעם אחיו ומשׁער מקומו עדים אתם היום׃
Rth 4:11
ויאמרו כל העם אשׁר בשׁער והזקנים עדים יתן יהוה את האשׁה הבאה אל ביתך כרחל וכלאה אשׁר בנו שׁתיהם את בית ישׂראל ועשׂה חיל באפרתה וקרא שׁם בבית לחם׃
Rth 4:12
ויהי ביתך כבית פרץ אשׁר ילדה תמר ליהודה מן הזרע אשׁר יתן יהוה לך מן הנערה הזאת׃
Rth 4:13
ויקח בעז את רות ותהי לו לאשׁה ויבא אליה ויתן יהוה לה הריון ותלד בן׃
Rth 4:14
ותאמרנה הנשׁים אל נעמי ברוך יהוה אשׁר לא השׁבית לך גאל היום ויקרא שׁמו בישׂראל׃
Rth 4:15
והיה לך למשׁיב נפשׁ ולכלכל את שׂיבתך כי כלתך אשׁר אהבתך ילדתו אשׁר היא טובה לך משׁבעה בנים׃
Rth 4:16
ותקח נעמי את הילד ותשׁתהו בחיקה ותהי לו לאמנת׃
Rth 4:17
ותקראנה לו השׁכנות שׁם לאמר ילד בן לנעמי ותקראנה שׁמו עובד הוא אבי ישׁי אבי דוד׃
Rth 4:18
ואלה תולדות פרץ פרץ הוליד את חצרון׃
Rth 4:19
וחצרון הוליד את רם ורם הוליד את עמינדב׃
Rth 4:20
ועמינדב הוליד את נחשׁון ונחשׁון הוליד את שׂלמה׃
Rth 4:21
ושׂלמון הוליד את בעז ובעז הוליד את עובד׃
Rth 4:22
ועבד הוליד את ישׁי וישׁי הוליד את דוד׃
СЛЕДУЮЩАЯ ГЛАВА - ИНДЕКС БИБЛИИ И ПОИСК
|
