| |
  Son 3:1
על משׁכבי בלילות בקשׁתי את שׁאהבה נפשׁי בקשׁתיו ולא מצאתיו׃
Son 3:2
אקומה נא ואסובבה בעיר בשׁוקים וברחבות אבקשׁה את שׁאהבה נפשׁי בקשׁתיו ולא מצאתיו׃
Son 3:3
מצאוני השׁמרים הסבבים בעיר את שׁאהבה נפשׁי ראיתם׃
Son 3:4
כמעט שׁעברתי מהם עד שׁמצאתי את שׁאהבה נפשׁי אחזתיו ולא ארפנו עד שׁהביאתיו אל בית אמי ואל חדר הורתי׃
Son 3:5
השׁבעתי אתכם בנות ירושׁלם בצבאות או באילות השׂדה אם תעירו ואם תעוררו את האהבה עד שׁתחפץ׃
Son 3:6
מי זאת עלה מן המדבר כתימרות עשׁן מקטרת מור ולבונה מכל אבקת רוכל׃
Son 3:7
הנה מטתו שׁלשׁלמה שׁשׁים גברים סביב לה מגברי ישׂראל׃
Son 3:8
כלם אחזי חרב מלמדי מלחמה אישׁ חרבו על ירכו מפחד בלילות׃
Son 3:9
אפריון עשׂה לו המלך שׁלמה מעצי הלבנון׃
Son 3:10
עמודיו עשׂה כסף רפידתו זהב מרכבו ארגמן תוכו רצוף אהבה מבנות ירושׁלם׃
Son 3:11
צאינה וראינה בנות ציון במלך שׁלמה בעטרה שׁעטרה לו אמו ביום חתנתו וביום שׂמחת לבו׃
СЛЕДУЮЩАЯ ГЛАВА - ИНДЕКС БИБЛИИ И ПОИСК
|
