اليونانية والعبرية الكتاب المقدس
2 CHRONICLES 6

2Ch 6:1
אז אמר שׁלמה יהוה אמר לשׁכון בערפל׃
2Ch 6:2
ואני בניתי בית זבל לך ומכון לשׁבתך עולמים׃
2Ch 6:3
ויסב המלך את פניו ויברך את כל קהל ישׂראל וכל קהל ישׂראל עומד׃
2Ch 6:4
ויאמר ברוך יהוה אלהי ישׂראל אשׁר דבר בפיו את דויד אבי ובידיו מלא לאמר׃
2Ch 6:5
מן היום אשׁר הוצאתי את עמי מארץ מצרים לא בחרתי בעיר מכל שׁבטי ישׂראל לבנות בית להיות שׁמי שׁם ולא בחרתי באישׁ להיות נגיד על עמי ישׂראל׃
2Ch 6:6
ואבחר בירושׁלם להיות שׁמי שׁם ואבחר בדויד להיות על עמי ישׂראל׃
2Ch 6:7
ויהי עם לבב דויד אבי לבנות בית לשׁם יהוה אלהי ישׂראל׃
2Ch 6:8
ויאמר יהוה אל דויד אבי יען אשׁר היה עם לבבך לבנות בית לשׁמי הטיבות כי היה עם לבבך׃
2Ch 6:9
רק אתה לא תבנה הבית כי בנך היוצא מחלציך הוא יבנה הבית לשׁמי׃
2Ch 6:10
ויקם יהוה את דברו אשׁר דבר ואקום תחת דויד אבי ואשׁב על כסא ישׂראל כאשׁר דבר יהוה ואבנה הבית לשׁם יהוה אלהי ישׂראל׃
2Ch 6:11
ואשׂים שׁם את הארון אשׁר שׁם ברית יהוה אשׁר כרת עם בני ישׂראל׃
2Ch 6:12
ויעמד לפני מזבח יהוה נגד כל קהל ישׂראל ויפרשׂ כפיו׃
2Ch 6:13
כי עשׂה שׁלמה כיור נחשׁת ויתנהו בתוך העזרה חמשׁ אמות ארכו וחמשׁ אמות רחבו ואמות שׁלושׁ קומתו ויעמד עליו ויברך על ברכיו נגד כל קהל ישׂראל ויפרשׂ כפיו השׁמימה׃
2Ch 6:14
ויאמר יהוה אלהי ישׂראל אין כמוך אלהים בשׁמים ובארץ שׁמר הברית והחסד לעבדיך ההלכים לפניך בכל לבם׃
2Ch 6:15
אשׁר שׁמרת לעבדך דויד אבי את אשׁר דברת לו ותדבר בפיך ובידך מלאת כיום הזה׃
2Ch 6:16
ועתה יהוה אלהי ישׂראל שׁמר לעבדך דויד אבי את אשׁר דברת לו לאמר לא יכרת לך אישׁ מלפני יושׁב על כסא ישׂראל רק אם ישׁמרו בניך את דרכם ללכת בתורתי כאשׁר הלכת לפני׃
2Ch 6:17
ועתה יהוה אלהי ישׂראל יאמן דברך אשׁר דברת לעבדך לדויד׃
2Ch 6:18
כי האמנם ישׁב אלהים את האדם על הארץ הנה שׁמים ושׁמי השׁמים לא יכלכלוך אף כי הבית הזה אשׁר בניתי׃
2Ch 6:19
ופנית אל תפלת עבדך ואל תחנתו יהוה אלהי לשׁמע אל הרנה ואל התפלה אשׁר עבדך מתפלל לפניך׃
2Ch 6:20
להיות עיניך פתחות אל הבית הזה יומם ולילה אל המקום אשׁר אמרת לשׂום שׁמך שׁם לשׁמוע אל התפלה אשׁר יתפלל עבדך אל המקום הזה׃
2Ch 6:21
ושׁמעת אל תחנוני עבדך ועמך ישׂראל אשׁר יתפללו אל המקום הזה ואתה תשׁמע ממקום שׁבתך מן השׁמים ושׁמעת וסלחת׃
2Ch 6:22
אם יחטא אישׁ לרעהו ונשׁא בו אלה להאלתו ובא אלה לפני מזבחך בבית הזה׃
2Ch 6:23
ואתה תשׁמע מן השׁמים ועשׂית ושׁפטת את עבדיך להשׁיב לרשׁע לתת דרכו בראשׁו ולהצדיק צדיק לתת לו כצדקתו׃
2Ch 6:24
ואם ינגף עמך ישׂראל לפני אויב כי יחטאו לך ושׁבו והודו את שׁמך והתפללו והתחננו לפניך בבית הזה׃
2Ch 6:25
ואתה תשׁמע מן השׁמים וסלחת לחטאת עמך ישׂראל והשׁיבותם אל האדמה אשׁר נתתה להם ולאבתיהם׃
2Ch 6:26
בהעצר השׁמים ולא יהיה מטר כי יחטאו לך והתפללו אל המקום הזה והודו את שׁמך מחטאתם ישׁובון כי תענם׃
2Ch 6:27
ואתה תשׁמע השׁמים וסלחת לחטאת עבדיך ועמך ישׂראל כי תורם אל הדרך הטובה אשׁר ילכו בה ונתתה מטר על ארצך אשׁר נתתה לעמך לנחלה׃
2Ch 6:28
רעב כי יהיה בארץ דבר כי יהיה שׁדפון וירקון ארבה וחסיל כי יהיה כי יצר לו אויביו בארץ שׁעריו כל נגע וכל מחלה׃
2Ch 6:29
כל תפלה כל תחנה אשׁר יהיה לכל האדם ולכל עמך ישׂראל אשׁר ידעו אישׁ נגעו ומכאבו ופרשׂ כפיו אל הבית הזה׃
2Ch 6:30
ואתה תשׁמע מן השׁמים מכון שׁבתך וסלחת ונתתה לאישׁ ככל דרכיו אשׁר תדע את לבבו כי אתה לבדך ידעת את לבב בני האדם׃
2Ch 6:31
למען ייראוך ללכת בדרכיך כל הימים אשׁר הם חיים על פני האדמה אשׁר נתתה לאבתינו׃
2Ch 6:32
וגם אל הנכרי אשׁר לא מעמך ישׂראל הוא ובא מארץ רחוקה למען שׁמך הגדול וידך החזקה וזרועך הנטויה ובאו והתפללו אל הבית הזה׃
2Ch 6:33
ואתה תשׁמע מן השׁמים ממכון שׁבתך ועשׂית ככל אשׁר יקרא אליך הנכרי למען ידעו כל עמי הארץ את שׁמך וליראה אתך כעמך ישׂראל ולדעת כי שׁמך נקרא על הבית הזה אשׁר בניתי׃
2Ch 6:34
כי יצא עמך למלחמה על אויביו בדרך אשׁר תשׁלחם והתפללו אליך דרך העיר הזאת אשׁר בחרת בה והבית אשׁר בניתי לשׁמך׃
2Ch 6:35
ושׁמעת מן השׁמים את תפלתם ואת תחנתם ועשׂית משׁפטם׃
2Ch 6:36
כי יחטאו לך כי אין אדם אשׁר לא יחטא ואנפת בם ונתתם לפני אויב ושׁבום שׁוביהם אל ארץ רחוקה או קרובה׃
2Ch 6:37
והשׁיבו אל לבבם בארץ אשׁר נשׁבו שׁם ושׁבו והתחננו אליך בארץ שׁבים לאמר חטאנו העוינו ורשׁענו׃
2Ch 6:38
ושׁבו אליך בכל לבם ובכל נפשׁם בארץ שׁבים אשׁר שׁבו אתם והתפללו דרך ארצם אשׁר נתתה לאבותם והעיר אשׁר בחרת ולבית אשׁר בניתי לשׁמך׃
2Ch 6:39
ושׁמעת מן השׁמים ממכון שׁבתך את תפלתם ואת תחנתיהם ועשׂית משׁפטם וסלחת לעמך אשׁר חטאו׃
2Ch 6:40
עתה אלהי יהיו נא עיניך פתחות ואזניך קשׁבות לתפלת המקום הזה׃
2Ch 6:41
ועתה קומה יהוה אלהים לנוחך אתה וארון עזך כהניך יהוה אלהים ילבשׁו תשׁועה וחסידיך ישׂמחו בטוב׃
2Ch 6:42
יהוה אלהים אל תשׁב פני משׁיחיך זכרה לחסדי דויד עבדך׃

تابِع بَنْد - بشارة بَيَان