اليونانية والعبرية الكتاب المقدس
DEUTERONOMY 33

Deu 33:1
וזאת הברכה אשׁר ברך משׁה אישׁ האלהים את בני ישׂראל לפני מותו׃
Deu 33:2
ויאמר יהוה מסיני בא וזרח משׂעיר למו הופיע מהר פארן ואתה מרבבת קדשׁ מימינו אשׁדת׃
Deu 33:3
אף חבב עמים כל קדשׁיו בידך והם תכו לרגלך ישׂא מדברתיך׃
Deu 33:4
תורה צוה לנו משׁה מורשׁה קהלת יעקב׃
Deu 33:5
ויהי בישׁרון מלך בהתאסף ראשׁי עם יחד שׁבטי ישׂראל׃
Deu 33:6
יחי ראובן ואל ימת ויהי מתיו מספר׃
Deu 33:7
וזאת ליהודה ויאמר שׁמע יהוה קול יהודה ואל עמו תביאנו ידיו רב לו ועזר מצריו תהיה׃
Deu 33:8
וללוי אמר תמיך ואוריך לאישׁ חסידך אשׁר נסיתו במסה תריבהו על מי מריבה׃
Deu 33:9
האמר לאביו ולאמו לא ראיתיו ואת אחיו לא הכיר ואת בנו לא ידע כי שׁמרו אמרתך ובריתך ינצרו׃
Deu 33:10
יורו משׁפטיך ליעקב ותורתך לישׂראל ישׂימו קטורה באפך וכליל על מזבחך׃
Deu 33:11
ברך יהוה חילו ופעל ידיו תרצה מחץ מתנים קמיו ומשׂנאיו מן יקומון׃
Deu 33:12
לבנימן אמר ידיד יהוה ישׁכן לבטח עליו חפף עליו כל היום ובין כתפיו שׁכן׃
Deu 33:13
וליוסף אמר מברכת יהוה ארצו ממגד שׁמים מטל ומתהום רבצת תחת׃
Deu 33:14
וממגד תבואת שׁמשׁ וממגד גרשׁ ירחים׃
Deu 33:15
ומראשׁ הררי קדם וממגד גבעות עולם׃
Deu 33:16
וממגד ארץ ומלאה ורצון שׁכני סנה תבואתה לראשׁ יוסף ולקדקד נזיר אחיו׃
Deu 33:17
בכור שׁורו הדר לו וקרני ראם קרניו בהם עמים ינגח יחדו אפסי ארץ והם רבבות אפרים והם אלפי מנשׁה׃
Deu 33:18
ולזבולן אמר שׂמח זבולן בצאתך וישׂשכר באהליך׃
Deu 33:19
עמים הר יקראו שׁם יזבחו זבחי צדק כי שׁפע ימים יינקו ושׂפני טמוני חול׃
Deu 33:20
ולגד אמר ברוך מרחיב גד כלביא שׁכן וטרף זרוע אף קדקד׃
Deu 33:21
וירא ראשׁית לו כי שׁם חלקת מחקק ספון ויתא ראשׁי עם צדקת יהוה עשׂה ומשׁפטיו עם ישׂראל׃
Deu 33:22
ולדן אמר דן גור אריה יזנק מן הבשׁן׃
Deu 33:23
ולנפתלי אמר נפתלי שׂבע רצון ומלא ברכת יהוה ים ודרום ירשׁה׃
Deu 33:24
ולאשׁר אמר ברוך מבנים אשׁר יהי רצוי אחיו וטבל בשׁמן רגלו׃
Deu 33:25
ברזל ונחשׁת מנעלך וכימיך דבאך׃
Deu 33:26
אין כאל ישׁרון רכב שׁמים בעזרך ובגאותו שׁחקים׃
Deu 33:27
מענה אלהי קדם ומתחת זרעת עולם ויגרשׁ מפניך אויב ויאמר השׁמד׃
Deu 33:28
וישׁכן ישׂראל בטח בדד עין יעקב אל ארץ דגן ותירושׁ אף שׁמיו יערפו טל׃
Deu 33:29
אשׁריך ישׂראל מי כמוך עם נושׁע ביהוה מגן עזרך ואשׁר חרב גאותך ויכחשׁו איביך לך ואתה על במותימו תדרך׃

تابِع بَنْد - بشارة بَيَان