اليونانية والعبرية الكتاب المقدس
EZRA 6

Ezr 6:1
באדין דריושׁ מלכא שׂם טעם ובקרו בבית ספריא די גנזיא מהחתין תמה בבבל׃
Ezr 6:2
והשׁתכח באחמתא בבירתא די במדי מדינתה מגלה חדה וכן כתיב בגוה דכרונה׃
Ezr 6:3
בשׁנת חדה לכורשׁ מלכא כורשׁ מלכא שׂם טעם בית אלהא בירושׁלם ביתא יתבנא אתר די דבחין דבחין ואשׁוהי מסובלין רומה אמין שׁתין פתיה אמין שׁתין׃
Ezr 6:4
נדבכין די אבן גלל תלתא ונדבך די אע חדת ונפקתא מן בית מלכא תתיהב׃
Ezr 6:5
ואף מאני בית אלהא די דהבה וכספא די נבוכדנצר הנפק מן היכלא די בירושׁלם והיבל לבבל יהתיבון ויהך להיכלא די בירושׁלם לאתרה ותחת בבית אלהא׃
Ezr 6:6
כען תתני פחת עבר נהרה שׁתר בוזני וכנותהון אפרסכיא די בעבר נהרה רחיקין הוו מן תמה׃
Ezr 6:7
שׁבקו לעבידת בית אלהא דך פחת יהודיא ולשׂבי יהודיא בית אלהא דך יבנון על אתרה׃
Ezr 6:8
ומני שׂים טעם למא די תעבדון עם שׂבי יהודיא אלך למבנא בית אלהא דך ומנכסי מלכא די מדת עבר נהרה אספרנא נפקתא תהוא מתיהבא לגבריא אלך די לא לבטלא׃
Ezr 6:9
ומה חשׁחן ובני תורין ודכרין ואמרין לעלון לאלה שׁמיא חנטין מלח חמר ומשׁח כמאמר כהניא די בירושׁלם להוא מתיהב להם יום ביום די לא שׁלו׃
Ezr 6:10
די להון מהקרבין ניחוחין לאלה שׁמיא ומצלין לחיי מלכא ובנוהי׃
Ezr 6:11
ומני שׂים טעם די כל אנשׁ די יהשׁנא פתגמא דנה יתנסח אע מן ביתה וזקיף יתמחא עלהי וביתה נולו יתעבד על דנה׃
Ezr 6:12
ואלהא די שׁכן שׁמה תמה ימגר כל מלך ועם די ישׁלח ידה להשׁניה לחבלה בית אלהא דך די בירושׁלם אנה דריושׁ שׂמת טעם אספרנא יתעבד׃
Ezr 6:13
אדין תתני פחת עבר נהרה שׁתר בוזני וכנותהון לקבל די שׁלח דריושׁ מלכא כנמא אספרנא עבדו׃
Ezr 6:14
ושׂבי יהודיא בנין ומצלחין בנבואת חגי נביאה וזכריה בר עדוא ובנו ושׁכללו מן טעם אלה ישׂראל ומטעם כורשׁ ודריושׁ וארתחשׁשׂתא מלך פרס׃
Ezr 6:15
ושׁיציא ביתה דנה עד יום תלתה לירח אדר די היא שׁנת שׁת למלכות דריושׁ מלכא׃
Ezr 6:16
ועבדו בני ישׂראל כהניא ולויא ושׁאר בני גלותא חנכת בית אלהא דנה בחדוה׃
Ezr 6:17
והקרבו לחנכת בית אלהא דנה תורין מאה דכרין מאתין אמרין ארבע מאה וצפירי עזין לחטיא על כל ישׂראל תרי עשׂר למנין שׁבטי ישׂראל׃
Ezr 6:18
והקימו כהניא בפלגתהון ולויא במחלקתהון על עבידת אלהא די בירושׁלם ככתב ספר משׁה׃
Ezr 6:19
ויעשׂו בני הגולה את הפסח בארבעה עשׂר לחדשׁ הראשׁון׃
Ezr 6:20
כי הטהרו הכהנים והלוים כאחד כלם טהורים וישׁחטו הפסח לכל בני הגולה ולאחיהם הכהנים ולהם׃
Ezr 6:21
ויאכלו בני ישׂראל השׁבים מהגולה וכל הנבדל מטמאת גוי הארץ אלהם לדרשׁ ליהוה אלהי ישׂראל׃
Ezr 6:22
ויעשׂו חג מצות שׁבעת ימים בשׂמחה כי שׂמחם יהוה והסב לב מלך אשׁור עליהם לחזק ידיהם במלאכת בית האלהים אלהי ישׂראל׃

تابِع بَنْد - بشارة بَيَان