اليونانية والعبرية الكتاب المقدس
HOSEA 1

Hos 1:1
דבר יהוה אשׁר היה אל הושׁע בן בארי בימי עזיה יותם אחז יחזקיה מלכי יהודה ובימי ירבעם בן יואשׁ מלך ישׂראל׃
Hos 1:2
תחלת דבר יהוה בהושׁע ויאמר יהוה אל הושׁע לך קח לך אשׁת זנונים וילדי זנונים כי זנה תזנה הארץ מאחרי יהוה׃
Hos 1:3
וילך ויקח את גמר בת דבלים ותהר ותלד לו בן׃
Hos 1:4
ויאמר יהוה אליו קרא שׁמו יזרעאל כי עוד מעט ופקדתי את דמי יזרעאל על בית יהוא והשׁבתי ממלכות בית ישׂראל׃
Hos 1:5
והיה ביום ההוא ושׁברתי את קשׁת ישׂראל בעמק יזרעאל׃
Hos 1:6
ותהר עוד ותלד בת ויאמר לו קרא שׁמה לא רחמה כי לא אוסיף עוד ארחם את בית ישׂראל כי נשׂא אשׂא׃
Hos 1:7
ואת בית יהודה ארחם והושׁעתים ביהוה אלהיהם ולא אושׁיעם בקשׁת ובחרב ובמלחמה בסוסים ובפרשׁים׃
Hos 1:8
ותגמל את לא רחמה ותהר ותלד בן׃
Hos 1:9
ויאמר קרא שׁמו לא עמי כי אתם לא עמי ואנכי לא אהיה׃
Hos 1:10 (2:1)
והיה מספר בני ישׂראל כחול הים אשׁר לא ימד ולא יספר והיה במקום אשׁר יאמר להם לא עמי אתם יאמר להם בני אל חי׃
Hos 1:11 (2:2)
ונקבצו בני יהודה ובני ישׂראל יחדו ושׂמו להם ראשׁ אחד ועלו מן הארץ כי גדול יום יזרעאל׃

تابِع بَنْد - بشارة بَيَان