اليونانية والعبرية الكتاب المقدس
ISAIAH 15

Isa 15:1
משׂא מואב כי בליל שׁדד ער מואב נדמה כי בליל שׁדד קיר מואב נדמה׃
Isa 15:2
עלה הבית ודיבן הבמות לבכי על נבו ועל מידבא מואב ייליל בכל ראשׁיו קרחה כל זקן גרועה׃
Isa 15:3
בחוצתיו חגרו שׂק על גגותיה וברחבתיה כלה ייליל ירד בבכי׃
Isa 15:4
ותזעק חשׁבון ואלעלה עד יהץ נשׁמע קולם על כן חלצי מואב יריעו נפשׁו ירעה׃
Isa 15:5
לבי למואב יזעק בריחה עד צער עגלת שׁלשׁיה כי מעלה הלוחית בבכי יעלה בו כי דרך חורנים זעקת שׁבר יעערו׃
Isa 15:6
כי מי נמרים משׁמות יהיו כי יבשׁ חציר כלה דשׁא ירק לא היה׃
Isa 15:7
על כן יתרה עשׂה ופקדתם על נחל הערבים ישׂאום׃
Isa 15:8
כי הקיפה הזעקה את גבול מואב עד אגלים יללתה ובאר אילים יללתה׃
Isa 15:9
כי מי דימון מלאו דם כי אשׁית על דימון נוספות לפליטת מואב אריה ולשׁארית אדמה׃

تابِع بَنْد - بشارة بَيَان