اليونانية والعبرية الكتاب المقدس
ISAIAH 51

Isa 51:1
שׁמעו אלי רדפי צדק מבקשׁי יהוה הביטו אל צור חצבתם ואל מקבת בור נקרתם׃
Isa 51:2
הביטו אל אברהם אביכם ואל שׂרה תחוללכם כי אחד קראתיו ואברכהו וארבהו׃
Isa 51:3
כי נחם יהוה ציון נחם כל חרבתיה וישׂם מדברה כעדן וערבתה כגן יהוה שׂשׂון ושׂמחה ימצא בה תודה וקול זמרה׃
Isa 51:4
הקשׁיבו אלי עמי ולאומי אלי האזינו כי תורה מאתי תצא ומשׁפטי לאור עמים ארגיע׃
Isa 51:5
קרוב צדקי יצא ישׁעי וזרעי עמים ישׁפטו אלי איים יקוו ואל זרעי ייחלון׃
Isa 51:6
שׂאו לשׁמים עיניכם והביטו אל הארץ מתחת כי שׁמים כעשׁן נמלחו והארץ כבגד תבלה וישׁביה כמו כן ימותון וישׁועתי לעולם תהיה וצדקתי לא תחת׃
Isa 51:7
שׁמעו אלי ידעי צדק עם תורתי בלבם אל תיראו חרפת אנושׁ ומגדפתם אל תחתו׃
Isa 51:8
כי כבגד יאכלם עשׁ וכצמר יאכלם סס וצדקתי לעולם תהיה וישׁועתי לדור דורים׃
Isa 51:9
עורי עורי לבשׁי עז זרוע יהוה עורי כימי קדם דרות עולמים הלוא את היא המחצבת רהב מחוללת תנין׃
Isa 51:10
הלוא את היא המחרבת ים מי תהום רבה השׂמה מעמקי ים דרך לעבר גאולים׃
Isa 51:11
ופדויי יהוה ישׁובון ובאו ציון ברנה ושׂמחת עולם על ראשׁם שׂשׂון ושׂמחה ישׂיגון נסו יגון ואנחה׃
Isa 51:12
אנכי אנכי הוא מנחמכם מי את ותיראי מאנושׁ ימות ומבן אדם חציר ינתן׃
Isa 51:13
ותשׁכח יהוה עשׂך נוטה שׁמים ויסד ארץ ותפחד תמיד כל היום מפני חמת המציק כאשׁר כונן להשׁחית ואיה חמת המציק׃
Isa 51:14
מהר צעה להפתח ולא ימות לשׁחת ולא יחסר לחמו׃
Isa 51:15
ואנכי יהוה אלהיך רגע הים ויהמו גליו יהוה צבאות שׁמו׃
Isa 51:16
ואשׂים דברי בפיך ובצל ידי כסיתיך לנטע שׁמים וליסד ארץ ולאמר לציון עמי אתה׃
Isa 51:17
התעוררי התעוררי קומי ירושׁלם אשׁר שׁתית מיד יהוה את כוס חמתו את קבעת כוס התרעלה שׁתית מצית׃
Isa 51:18
אין מנהל לה מכל בנים ילדה ואין מחזיק בידה מכל בנים גדלה׃
Isa 51:19
שׁתים הנה קראתיך מי ינוד לך השׁד והשׁבר והרעב והחרב מי אנחמך׃
Isa 51:20
בניך עלפו שׁכבו בראשׁ כל חוצות כתוא מכמר המלאים חמת יהוה גערת אלהיך׃
Isa 51:21
לכן שׁמעי נא זאת עניה ושׁכרת ולא מיין׃
Isa 51:22
כה אמר אדניך יהוה ואלהיך יריב עמו הנה לקחתי מידך את כוס התרעלה את קבעת כוס חמתי לא תוסיפי לשׁתותה עוד׃
Isa 51:23
ושׂמתיה ביד מוגיך אשׁר אמרו לנפשׁך שׁחי ונעברה ותשׂימי כארץ גוך וכחוץ לעברים׃

تابِع بَنْد - بشارة بَيَان