اليونانية والعبرية الكتاب المقدس
JEREMIAH 21

Jer 21:1
הדבר אשׁר היה אל ירמיהו מאת יהוה בשׁלח אליו המלך צדקיהו את פשׁחור בן מלכיה ואת צפניה בן מעשׂיה הכהן לאמר׃
Jer 21:2
דרשׁ נא בעדנו את יהוה כי נבוכדראצר מלך בבל נלחם עלינו אולי יעשׂה יהוה אותנו ככל נפלאתיו ויעלה מעלינו׃
Jer 21:3
ויאמר ירמיהו אליהם כה תאמרן אל צדקיהו׃
Jer 21:4
כה אמר יהוה אלהי ישׂראל הנני מסב את כלי המלחמה אשׁר בידכם אשׁר אתם נלחמים בם את מלך בבל ואת הכשׂדים הצרים עליכם מחוץ לחומה ואספתי אותם אל תוך העיר הזאת׃
Jer 21:5
ונלחמתי אני אתכם ביד נטויה ובזרוע חזקה ובאף ובחמה ובקצף גדול׃
Jer 21:6
והכיתי את יושׁבי העיר הזאת ואת האדם ואת הבהמה בדבר גדול ימתו׃
Jer 21:7
ואחרי כן נאם יהוה אתן את צדקיהו מלך יהודה ואת עבדיו ואת העם ואת הנשׁארים בעיר הזאת מן הדבר מן החרב ומן הרעב ביד נבוכדראצר מלך בבל וביד איביהם וביד מבקשׁי נפשׁם והכם לפי חרב לא יחוס עליהם ולא יחמל ולא ירחם׃
Jer 21:8
ואל העם הזה תאמר כה אמר יהוה הנני נתן לפניכם את דרך החיים ואת דרך המות׃
Jer 21:9
הישׁב בעיר הזאת ימות בחרב וברעב ובדבר והיוצא ונפל על הכשׂדים הצרים עליכם יחיה והיתה לו נפשׁו לשׁלל׃
Jer 21:10
כי שׂמתי פני בעיר הזאת לרעה ולא לטובה נאם יהוה ביד מלך בבל תנתן ושׂרפה באשׁ׃
Jer 21:11
ולבית מלך יהודה שׁמעו דבר יהוה׃
Jer 21:12
בית דוד כה אמר יהוה דינו לבקר משׁפט והצילו גזול מיד עושׁק פן תצא כאשׁ חמתי ובערה ואין מכבה מפני רע מעלליהם׃
Jer 21:13
הנני אליך ישׁבת העמק צור המישׁר נאם יהוה האמרים מי יחת עלינו ומי יבוא במעונותינו׃
Jer 21:14
ופקדתי עליכם כפרי מעלליכם נאם יהוה והצתי אשׁ ביערה ואכלה כל סביביה׃

تابِع بَنْد - بشارة بَيَان