اليونانية والعبرية الكتاب المقدس
LEVITICUS 11

Lev 11:1
וידבר יהוה אל משׁה ואל אהרן לאמר אלהם׃
Lev 11:2
דברו אל בני ישׂראל לאמר זאת החיה אשׁר תאכלו מכל הבהמה אשׁר על הארץ׃
Lev 11:3
כל מפרסת פרסה ושׁסעת שׁסע פרסת מעלת גרה בבהמה אתה תאכלו׃
Lev 11:4
אך את זה לא תאכלו ממעלי הגרה וממפרסי הפרסה את הגמל כי מעלה גרה הוא ופרסה איננו מפריס טמא הוא׃
Lev 11:5
ואת השׁפן כי מעלה גרה הוא ופרסה לא יפריס טמא הוא׃
Lev 11:6
ואת הארנבת כי מעלת גרה הוא ופרסה לא הפריסה טמאה הוא׃
Lev 11:7
ואת החזיר כי מפריס פרסה הוא ושׁסע שׁסע פרסה והוא גרה לא יגר טמא הוא׃
Lev 11:8
מבשׂרם לא תאכלו ובנבלתם לא תגעו טמאים הם׃
Lev 11:9
את זה תאכלו מכל אשׁר במים כל אשׁר לו סנפיר וקשׂקשׂת במים בימים ובנחלים אתם תאכלו׃
Lev 11:10
וכל אשׁר אין לו סנפיר וקשׂקשׂת בימים ובנחלים מכל שׁרץ המים ומכל נפשׁ החיה אשׁר במים שׁקץ הם׃
Lev 11:11
ושׁקץ יהיו לכם מבשׂרם לא תאכלו ואת נבלתם תשׁקצו׃
Lev 11:12
כל אשׁר אין לו סנפיר וקשׂקשׂת במים שׁקץ הוא׃
Lev 11:13
ואת אלה תשׁקצו מן העוף לא יאכלו שׁקץ הם את הנשׁר ואת הפרס ואת העזניה׃
Lev 11:14
ואת הדאה ואת האיה למינה׃
Lev 11:15
את כל ערב למינו׃
Lev 11:16
ואת בת היענה ואת התחמס ואת השׁחף ואת הנץ למינהו׃
Lev 11:17
ואת הכוס ואת השׁלך ואת הינשׁוף׃
Lev 11:18
ואת התנשׁמת ואת הקאת ואת הרחם׃
Lev 11:19
ואת החסידה האנפה למינה ואת הדוכיפת ואת העטלף׃
Lev 11:20
כל שׁרץ העוף ההלך על ארבע שׁקץ הוא׃
Lev 11:21
אך את זה תאכלו מכל שׁרץ העוף ההלך על ארבע אשׁר לא כרעים ממעל לרגליו לנתר בהן על הארץ׃
Lev 11:22
את אלה מהם תאכלו את הארבה למינו ואת הסלעם למינהו ואת החרגל למינהו ואת החגב למינהו׃
Lev 11:23
וכל שׁרץ העוף אשׁר לו ארבע רגלים שׁקץ הוא׃
Lev 11:24
ולאלה תטמאו כל הנגע בנבלתם יטמא עד הערב׃
Lev 11:25
וכל הנשׂא מנבלתם יכבס בגדיו וטמא עד הערב׃
Lev 11:26
לכל הבהמה אשׁר הוא מפרסת פרסה ושׁסע איננה שׁסעת וגרה איננה מעלה טמאים הם לכם כל הנגע בהם יטמא׃
Lev 11:27
וכל הולך על כפיו בכל החיה ההלכת על ארבע טמאים הם לכם כל הנגע בנבלתם יטמא עד הערב׃
Lev 11:28
והנשׂא את נבלתם יכבס בגדיו וטמא עד הערב טמאים המה׃
Lev 11:29
וזה לכם הטמא בשׁרץ השׁרץ על הארץ החלד והעכבר והצב למינהו׃
Lev 11:30
והאנקה והכח והלטאה והחמט והתנשׁמת׃
Lev 11:31
אלה הטמאים לכם בכל השׁרץ כל הנגע בהם במתם יטמא עד הערב׃
Lev 11:32
וכל אשׁר יפל עליו מהם במתם יטמא מכל כלי עץ או בגד או עור או שׂק כל כלי אשׁר יעשׂה מלאכה בהם במים יובא וטמא עד הערב וטהר׃
Lev 11:33
וכל כלי חרשׂ אשׁר יפל מהם אל תוכו כל אשׁר בתוכו יטמא ואתו תשׁברו׃
Lev 11:34
מכל האכל אשׁר יאכל אשׁר יבוא עליו מים יטמא וכל משׁקה אשׁר ישׁתה בכל כלי יטמא׃
Lev 11:35
וכל אשׁר יפל מנבלתם עליו יטמא תנור וכירים יתץ טמאים הם וטמאים יהיו׃
Lev 11:36
אך מעין ובור מקוה מים יהיה טהור ונגע בנבלתם יטמא׃
Lev 11:37
וכי יפל מנבלתם על כל זרע זרוע אשׁר יזרע טהור הוא׃
Lev 11:38
וכי יתן מים על זרע ונפל מנבלתם עליו טמא הוא׃
Lev 11:39
וכי ימות מן הבהמה אשׁר היא לכם לאכלה הנגע בנבלתה יטמא עד הערב׃
Lev 11:40
והאכל מנבלתה יכבס בגדיו וטמא עד הערב והנשׂא את נבלתה יכבס בגדיו וטמא עד הערב׃
Lev 11:41
וכל השׁרץ השׁרץ על הארץ שׁקץ הוא לא יאכל׃
Lev 11:42
כל הולך על גחון וכל הולך על ארבע עד כל מרבה רגלים לכל השׁרץ השׁרץ על הארץ לא תאכלום כי שׁקץ הם׃
Lev 11:43
אל תשׁקצו את נפשׁתיכם בכל השׁרץ השׁרץ ולא תטמאו בהם ונטמתם׃
Lev 11:44
כי אני יהוה אלהיכם והתקדשׁתם והייתם קדשׁים כי קדושׁ אני ולא תטמאו את נפשׁתיכם בכל השׁרץ הרמשׂ על הארץ׃
Lev 11:45
כי אני יהוה המעלה אתכם מארץ מצרים להית לכם לאלהים והייתם קדשׁים כי קדושׁ אני׃
Lev 11:46
זאת תורת הבהמה והעוף וכל נפשׁ החיה הרמשׂת במים ולכל נפשׁ השׁרצת על הארץ׃
Lev 11:47
להבדיל בין הטמא ובין הטהר ובין החיה הנאכלת ובין החיה אשׁר לא תאכל׃

تابِع بَنْد - بشارة بَيَان