اليونانية والعبرية الكتاب المقدس
NAHUM 3

Nah 3:1
הוי עיר דמים כלה כחשׁ פרק מלאה לא ימישׁ טרף׃
Nah 3:2
קול שׁוט וקול רעשׁ אופן וסוס דהר ומרכבה מרקדה׃
Nah 3:3
פרשׁ מעלה ולהב חרב וברק חנית ורב חלל וכבד פגר ואין קצה לגויה יכשׁלו בגויתם׃
Nah 3:4
מרב זנוני זונה טובת חן בעלת כשׁפים המכרת גוים בזנוניה ומשׁפחות בכשׁפיה׃
Nah 3:5
הנני אליך נאם יהוה צבאות וגליתי שׁוליך על פניך והראיתי גוים מערך וממלכות קלונך׃
Nah 3:6
והשׁלכתי עליך שׁקצים ונבלתיך ושׂמתיך כראי׃
Nah 3:7
והיה כל ראיך ידוד ממך ואמר שׁדדה נינוה מי ינוד לה מאין אבקשׁ מנחמים׃
Nah 3:8
התיטבי מנא אמון הישׁבה ביארים מים סביב לה אשׁר חיל ים מים חומתה׃
Nah 3:9
כושׁ עצמה ומצרים ואין קצה פוט ולובים היו בעזרתך׃
Nah 3:10
גם היא לגלה הלכה בשׁבי גם עלליה ירטשׁו בראשׁ כל חוצות ועל נכבדיה ידו גורל וכל גדוליה רתקו בזקים׃
Nah 3:11
גם את תשׁכרי תהי נעלמה גם את תבקשׁי מעוז מאויב׃
Nah 3:12
כל מבצריך תאנים עם בכורים אם ינועו ונפלו על פי אוכל׃
Nah 3:13
הנה עמך נשׁים בקרבך לאיביך פתוח נפתחו שׁערי ארצך אכלה אשׁ בריחיך׃
Nah 3:14
מי מצור שׁאבי לך חזקי מבצריך באי בטיט ורמסי בחמר החזיקי מלבן׃
Nah 3:15
שׁם תאכלך אשׁ תכריתך חרב תאכלך כילק התכבד כילק התכבדי כארבה׃
Nah 3:16
הרבית רכליך מכוכבי השׁמים ילק פשׁט ויעף׃
Nah 3:17
מנזריך כארבה וטפסריך כגוב גבי החונים בגדרות ביום קרה שׁמשׁ זרחה ונודד ולא נודע מקומו אים׃
Nah 3:18
נמו רעיך מלך אשׁור ישׁכנו אדיריך נפשׁו עמך על ההרים ואין מקבץ׃
Nah 3:19
אין כהה לשׁברך נחלה מכתך כל שׁמעי שׁמעך תקעו כף עליך כי על מי לא עברה רעתך תמיד׃

تابِع بَنْد - بشارة بَيَان