| |  |
  1Sa 18:1
ויהי ככלתו לדבר אל שׁאול ונפשׁ יהונתן נקשׁרה בנפשׁ דוד ויאהבו יהונתן כנפשׁו׃
1Sa 18:2
ויקחהו שׁאול ביום ההוא ולא נתנו לשׁוב בית אביו׃
1Sa 18:3
ויכרת יהונתן ודוד ברית באהבתו אתו כנפשׁו׃
1Sa 18:4
ויתפשׁט יהונתן את המעיל אשׁר עליו ויתנהו לדוד ומדיו ועד חרבו ועד קשׁתו ועד חגרו׃
1Sa 18:5
ויצא דוד בכל אשׁר ישׁלחנו שׁאול ישׂכיל וישׂמהו שׁאול על אנשׁי המלחמה וייטב בעיני כל העם וגם בעיני עבדי שׁאול׃
1Sa 18:6
ויהי בבואם בשׁוב דוד מהכות את הפלשׁתי ותצאנה הנשׁים מכל ערי ישׂראל לשׁור והמחלות לקראת שׁאול המלך בתפים בשׂמחה ובשׁלשׁים׃
1Sa 18:7
ותענינה הנשׁים המשׂחקות ותאמרן הכה שׁאול באלפו ודוד ברבבתיו׃
1Sa 18:8
ויחר לשׁאול מאד וירע בעיניו הדבר הזה ויאמר נתנו לדוד רבבות ולי נתנו האלפים ועוד לו אך המלוכה׃
1Sa 18:9
ויהי שׁאול עון את דוד מהיום ההוא והלאה׃
1Sa 18:10
ויהי ממחרת ותצלח רוח אלהים רעה אל שׁאול ויתנבא בתוך הבית ודוד מנגן בידו כיום ביום והחנית ביד שׁאול׃
1Sa 18:11
ויטל שׁאול את החנית ויאמר אכה בדוד ובקיר ויסב דוד מפניו פעמים׃
1Sa 18:12
וירא שׁאול מלפני דוד כי היה יהוה עמו ומעם שׁאול סר׃
1Sa 18:13
ויסרהו שׁאול מעמו וישׂמהו לו שׂר אלף ויצא ויבא לפני העם׃
1Sa 18:14
ויהי דוד לכל דרכו משׂכיל ויהוה עמו׃
1Sa 18:15
וירא שׁאול אשׁר הוא משׂכיל מאד ויגר מפניו׃
1Sa 18:16
וכל ישׂראל ויהודה אהב את דוד כי הוא יוצא ובא לפניהם׃
1Sa 18:17
ויאמר שׁאול אל דוד הנה בתי הגדולה מרב אתה אתן לך לאשׁה אך היה לי לבן חיל והלחם מלחמות יהוה ושׁאול אמר אל תהי ידי בו ותהי בו יד פלשׁתים׃
1Sa 18:18
ויאמר דוד אל שׁאול מי אנכי ומי חיי משׁפחת אבי בישׂראל כי אהיה חתן למלך׃
1Sa 18:19
ויהי בעת תת את מרב בת שׁאול לדוד והיא נתנה לעדריאל המחלתי לאשׁה׃
1Sa 18:20
ותאהב מיכל בת שׁאול את דוד ויגדו לשׁאול וישׁר הדבר בעיניו׃
1Sa 18:21
ויאמר שׁאול אתננה לו ותהי לו למוקשׁ ותהי בו יד פלשׁתים ויאמר שׁאול אל דוד בשׁתים תתחתן בי היום׃
1Sa 18:22
ויצו שׁאול את עבדו דברו אל דוד בלט לאמר הנה חפץ בך המלך וכל עבדיו אהבוך ועתה התחתן במלך׃
1Sa 18:23
וידברו עבדי שׁאול באזני דוד את הדברים האלה ויאמר דוד הנקלה בעיניכם התחתן במלך ואנכי אישׁ רשׁ ונקלה׃
1Sa 18:24
ויגדו עבדי שׁאול לו לאמר כדברים האלה דבר דוד׃
1Sa 18:25
ויאמר שׁאול כה תאמרו לדוד אין חפץ למלך במהר כי במאה ערלות פלשׁתים להנקם באיבי המלך ושׁאול חשׁב להפיל את דוד ביד פלשׁתים׃
1Sa 18:26
ויגדו עבדיו לדוד את הדברים האלה וישׁר הדבר בעיני דוד להתחתן במלך ולא מלאו הימים׃
1Sa 18:27
ויקם דוד וילך הוא ואנשׁיו ויך בפלשׁתים מאתים אישׁ ויבא דוד את ערלתיהם וימלאום למלך להתחתן במלך ויתן לו שׁאול את מיכל בתו לאשׁה׃
1Sa 18:28
וירא שׁאול וידע כי יהוה עם דוד ומיכל בת שׁאול אהבתהו׃
1Sa 18:29
ויאסף שׁאול לרא מפני דוד עוד ויהי שׁאול איב את דוד כל הימים׃
1Sa 18:30
ויצאו שׂרי פלשׁתים ויהי מדי צאתם שׂכל דוד מכל עבדי שׁאול וייקר שׁמו מאד׃
СЛЕДУЮЩАЯ ГЛАВА - ИНДЕКС БИБЛИИ И ПОИСК
|
