| |  |
  Isa 1:1
חזון ישׁעיהו בן אמוץ אשׁר חזה על יהודה וירושׁלם בימי עזיהו יותם אחז יחזקיהו מלכי יהודה׃
Isa 1:2
שׁמעו שׁמים והאזיני ארץ כי יהוה דבר בנים גדלתי ורוממתי והם פשׁעו׃
Isa 1:3
ידע שׁור קנהו וחמור אבוס בעליו ישׂראל לא ידע עמי לא התבונן׃
Isa 1:4
הוי גוי חטא עם כבד עון זרע מרעים בנים משׁחיתים עזבו את יהוה נאצו את קדושׁ ישׂראל נזרו אחור׃
Isa 1:5
על מה תכו עוד תוסיפו סרה כל ראשׁ לחלי וכל לבב דוי׃
Isa 1:6
מכף רגל ועד ראשׁ אין בו מתם פצע וחבורה ומכה טריה לא זרו ולא חבשׁו ולא רככה בשׁמן׃
Isa 1:7
ארצכם שׁממה עריכם שׂרפות אשׁ אדמתכם לנגדכם זרים אכלים אתה ושׁממה כמהפכת זרים׃
Isa 1:8
ונותרה בת ציון כסכה בכרם כמלונה במקשׁה כעיר נצורה׃
Isa 1:9
לולי יהוה צבאות הותיר לנו שׂריד כמעט כסדם היינו לעמרה דמינו׃
Isa 1:10
שׁמעו דבר יהוה קציני סדם האזינו תורת אלהינו עם עמרה׃
Isa 1:11
למה לי רב זבחיכם יאמר יהוה שׂבעתי עלות אילים וחלב מריאים ודם פרים וכבשׂים ועתודים לא חפצתי׃
Isa 1:12
כי תבאו לראות פני מי בקשׁ זאת מידכם רמס חצרי׃
Isa 1:13
לא תוסיפו הביא מנחת שׁוא קטרת תועבה היא לי חדשׁ ושׁבת קרא מקרא לא אוכל און ועצרה׃
Isa 1:14
חדשׁיכם ומועדיכם שׂנאה נפשׁי היו עלי לטרח נלאיתי נשׂא׃
Isa 1:15
ובפרשׂכם כפיכם אעלים עיני מכם גם כי תרבו תפלה אינני שׁמע ידיכם דמים מלאו׃
Isa 1:16
רחצו הזכו הסירו רע מעלליכם מנגד עיני חדלו הרע׃
Isa 1:17
למדו היטב דרשׁו משׁפט אשׁרו חמוץ שׁפטו יתום ריבו אלמנה׃
Isa 1:18
לכו נא ונוכחה יאמר יהוה אם יהיו חטאיכם כשׁנים כשׁלג ילבינו אם יאדימו כתולע כצמר יהיו׃
Isa 1:19
אם תאבו ושׁמעתם טוב הארץ תאכלו׃
Isa 1:20
ואם תמאנו ומריתם חרב תאכלו כי פי יהוה דבר׃
Isa 1:21
איכה היתה לזונה קריה נאמנה מלאתי משׁפט צדק ילין בה ועתה מרצחים׃
Isa 1:22
כספך היה לסיגים סבאך מהול במים׃
Isa 1:23
שׂריך סוררים וחברי גנבים כלו אהב שׁחד ורדף שׁלמנים יתום לא ישׁפטו וריב אלמנה לא יבוא אליהם׃
Isa 1:24
לכן נאם האדון יהוה צבאות אביר ישׂראל הוי אנחם מצרי ואנקמה מאויבי׃
Isa 1:25
ואשׁיבה ידי עליך ואצרף כבר סיגיך ואסירה כל בדיליך׃
Isa 1:26
ואשׁיבה שׁפטיך כבראשׁנה ויעציך כבתחלה אחרי כן יקרא לך עיר הצדק קריה נאמנה׃
Isa 1:27
ציון במשׁפט תפדה ושׁביה בצדקה׃
Isa 1:28
ושׁבר פשׁעים וחטאים יחדו ועזבי יהוה יכלו׃
Isa 1:29
כי יבשׁו מאילים אשׁר חמדתם ותחפרו מהגנות אשׁר בחרתם׃
Isa 1:30
כי תהיו כאלה נבלת עלה וכגנה אשׁר מים אין׃
Isa 1:31
והיה החסן לנערת ופעלו לניצוץ ובערו שׁניהם יחדו ואין מכבה׃
СЛЕДУЮЩАЯ ГЛАВА - ИНДЕКС БИБЛИИ И ПОИСК
|
