| |
  Psa 91:1
ישׁב בסתר עליון בצל שׁדי יתלונן׃
Psa 91:2
אמר ליהוה מחסי ומצודתי אלהי אבטח׃
Psa 91:3
כי הוא יצילך מפח יקושׁ מדבר הוות׃
Psa 91:4
באברתו יסך לך ותחת כנפיו תחסה צנה וסחרה אמתו׃
Psa 91:5
לא תירא מפחד לילה מחץ יעוף יומם׃
Psa 91:6
מדבר באפל יהלך מקטב ישׁוד צהרים׃
Psa 91:7
יפל מצדך אלף ורבבה מימינך אליך לא יגשׁ׃
Psa 91:8
רק בעיניך תביט ושׁלמת רשׁעים תראה׃
Psa 91:9
כי אתה יהוה מחסי עליון שׂמת מעונך׃
Psa 91:10
לא תאנה אליך רעה ונגע לא יקרב באהלך׃
Psa 91:11
כי מלאכיו יצוה לך לשׁמרך בכל דרכיך׃
Psa 91:12
על כפים ישׂאונך פן תגף באבן רגלך׃
Psa 91:13
על שׁחל ופתן תדרך תרמס כפיר ותנין׃
Psa 91:14
כי בי חשׁק ואפלטהו אשׂגבהו כי ידע שׁמי׃
Psa 91:15
יקראני ואענהו עמו אנכי בצרה אחלצהו ואכבדהו׃
Psa 91:16
ארך ימים אשׂביעהו ואראהו בישׁועתי׃
СЛЕДУЮЩАЯ ГЛАВА - ИНДЕКС БИБЛИИ И ПОИСК
|
