PREVIOUS CHAPTER - NEXT CHAPTER - HELP - GR VIDEOS - GR YOUTUBE - TWITTER - SD1 YOUTUBE    

Mic 1:1
דבר יהוה אשׁר היה אל מיכה המרשׁתי בימי יותם אחז יחזקיה מלכי יהודה אשׁר חזה על שׁמרון וירושׁלם׃
Mic 1:2
שׁמעו עמים כלם הקשׁיבי ארץ ומלאה ויהי אדני יהוה בכם  לעד  אדני מהיכל קדשׁו׃
Mic 1:3
כי הנה יהוה יצא ממקומו וירד ודרך על במותי ארץ׃
Mic 1:4
ונמסו ההרים תחתיו והעמקים יתבקעו כדונג מפני האשׁ כמים מגרים במורד׃
Mic 1:5
בפשׁע יעקב כל זאת ובחטאות בית ישׂראל מי פשׁע יעקב הלוא שׁמרון ומי במות יהודה הלוא ירושׁלם׃
Mic 1:6
ושׂמתי שׁמרון לעי השׂדה למטעי כרם והגרתי לגי אבניה  ויסדיה אגלה׃
Mic 1:7
וכל פסיליה יכתו וכל אתנניה ישׂרפו באשׁ וכל עצביה אשׂים שׁממה כי מאתנן זונה קבצה ועד אתנן זונה ישׁובו׃
Mic 1:8
על זאת אספדה ואילילה אילכה שׁילל וערום אעשׂה מספד כתנים ואבל  כבנות יענה׃
Mic 1:9
כי אנושׁה מכותיה כי באה עד יהודה נגע עד שׁער עמי עד ירושׁלם׃
Mic 1:10
בגת אל תגידו בכו אל תבכו בבית  לעפרה  עפר התפלשׁתי׃
Mic 1:11
עברי לכם  יושׁבת  שׁפיר עריה בשׁת לא יצאה יושׁבת צאנן מספד בית  האצל  יקח מכם עמדתו׃
Mic 1:12
כי חלה לטוב יושׁבת מרות כי ירד רע מאת יהוה לשׁער ירושׁלם׃
Mic 1:13
רתם המרכבה לרכשׁ יושׁבת לכישׁ ראשׁית חטאת היא לבת ציון כי בך  נמצאו  פשׁעי ישׂראל׃
Mic 1:14
לכן תתני שׁלוחים על מורשׁת  גת  בתי אכזיב לאכזב למלכי ישׂראל׃
Mic 1:15
עד הירשׁ אבי לך  יושׁבת  מרשׁה עד עדלם יבוא כבוד ישׂראל׃
Mic 1:16
קרחי וגזי על בני תענוגיך הרחבי קרחתך כנשׁר כי גלו ממך׃

GOTO NEXT CHAPTER - HEBREW & GREEK INDEX & SEARCH