اليونانية والعبرية الكتاب المقدس
DEUTERONOMY 25

Deu 25:1
כי יהיה ריב בין אנשׁים ונגשׁו אל המשׁפט ושׁפטום והצדיקו את הצדיק והרשׁיעו את הרשׁע׃
Deu 25:2
והיה אם בן הכות הרשׁע והפילו השׁפט והכהו לפניו כדי רשׁעתו במספר׃
Deu 25:3
ארבעים יכנו לא יסיף פן יסיף להכתו על אלה מכה רבה ונקלה אחיך לעיניך׃
Deu 25:4
לא תחסם שׁור בדישׁו׃
Deu 25:5
כי ישׁבו אחים יחדו ומת אחד מהם ובן אין לו לא תהיה אשׁת המת החוצה לאישׁ זר יבמה יבא עליה ולקחה לו לאשׁה ויבמה׃
Deu 25:6
והיה הבכור אשׁר תלד יקום על שׁם אחיו המת ולא ימחה שׁמו מישׂראל׃
Deu 25:7
ואם לא יחפץ האישׁ לקחת את יבמתו ועלתה יבמתו השׁערה אל הזקנים ואמרה מאן יבמי להקים לאחיו שׁם בישׂראל לא אבה יבמי׃
Deu 25:8
וקראו לו זקני עירו ודברו אליו ועמד ואמר לא חפצתי לקחתה׃
Deu 25:9
ונגשׁה יבמתו אליו לעיני הזקנים וחלצה נעלו מעל רגלו וירקה בפניו וענתה ואמרה ככה יעשׂה לאישׁ אשׁר לא יבנה את בית אחיו׃
Deu 25:10
ונקרא שׁמו בישׂראל בית חלוץ הנעל׃
Deu 25:11
כי ינצו אנשׁים יחדו אישׁ ואחיו וקרבה אשׁת האחד להציל את אישׁה מיד מכהו ושׁלחה ידה והחזיקה במבשׁיו׃
Deu 25:12
וקצתה את כפה לא תחוס עינך׃
Deu 25:13
לא יהיה לך בכיסך אבן ואבן גדולה וקטנה׃
Deu 25:14
לא יהיה לך בביתך איפה ואיפה גדולה וקטנה׃
Deu 25:15
אבן שׁלמה וצדק יהיה לך איפה שׁלמה וצדק יהיה לך למען יאריכו ימיך על האדמה אשׁר יהוה אלהיך נתן׃
Deu 25:16
כי תועבת יהוה אלהיך כל עשׂה אלה כל עשׂה עול׃
Deu 25:17
זכור את אשׁר עשׂה לך עמלק בדרך בצאתכם ממצרים׃
Deu 25:18
אשׁר קרך בדרך ויזנב בך כל הנחשׁלים אחריך ואתה עיף ויגע ולא ירא אלהים׃
Deu 25:19
והיה בהניח יהוה אלהיך לך מכל איביך מסביב בארץ אשׁר יהוה אלהיך נתן לך נחלה לרשׁתה תמחה את זכר עמלק מתחת השׁמים לא תשׁכח׃

تابِع بَنْد - بشارة بَيَان