اليونانية والعبرية الكتاب المقدس
DEUTERONOMY 26

Deu 26:1
והיה כי תבוא אל הארץ אשׁר יהוה אלהיך נתן לך נחלה וירשׁתה וישׁבת׃
Deu 26:2
ולקחת מראשׁית כל פרי האדמה אשׁר תביא מארצך אשׁר יהוה אלהיך נתן לך ושׂמת בטנא והלכת אל המקום אשׁר יבחר יהוה אלהיך לשׁכן שׁמו שׁם׃
Deu 26:3
ובאת אל הכהן אשׁר יהיה בימים ההם ואמרת אליו הגדתי היום ליהוה אלהיך כי באתי אל הארץ אשׁר נשׁבע יהוה לאבתינו לתת׃
Deu 26:4
ולקח הכהן הטנא מידך והניחו לפני מזבח יהוה אלהיך׃
Deu 26:5
וענית ואמרת לפני יהוה אלהיך ארמי אבד אבי וירד מצרימה ויגר שׁם במתי מעט ויהי שׁם לגוי גדול עצום ורב׃
Deu 26:6
וירעו אתנו המצרים ויענונו ויתנו עלינו עבדה קשׁה׃
Deu 26:7
ונצעק אל יהוה אלהי אבתינו וישׁמע יהוה את קלנו וירא את ענינו ואת עמלנו ואת לחצנו׃
Deu 26:8
ויוצאנו יהוה ממצרים ביד חזקה ובזרע נטויה ובמרא גדל ובאתות ובמפתים׃
Deu 26:9
ויבאנו אל המקום הזה ויתן לנו את הארץ הזאת ארץ זבת חלב ודבשׁ׃
Deu 26:10
ועתה הנה הבאתי את ראשׁית פרי האדמה אשׁר נתתה לי יהוה והנחתו לפני יהוה אלהיך והשׁתחוית לפני יהוה אלהיך׃
Deu 26:11
ושׂמחת בכל הטוב אשׁר נתן לך יהוה אלהיך ולביתך אתה והלוי והגר אשׁר בקרבך׃
Deu 26:12
כי תכלה לעשׂר את כל מעשׂר תבואתך בשׁנה השׁלישׁת שׁנת המעשׂר ונתתה ללוי לגר ליתום ולאלמנה ואכלו בשׁעריך ושׂבעו׃
Deu 26:13
ואמרת לפני יהוה אלהיך בערתי הקדשׁ מן הבית וגם נתתיו ללוי ולגר ליתום ולאלמנה ככל מצותך אשׁר צויתני לא עברתי ממצותיך ולא שׁכחתי׃
Deu 26:14
לא אכלתי באני ממנו ולא בערתי ממנו בטמא ולא נתתי ממנו למת שׁמעתי בקול יהוה אלהי עשׂיתי ככל אשׁר צויתני׃
Deu 26:15
השׁקיפה ממעון קדשׁך מן השׁמים וברך את עמך את ישׂראל ואת האדמה אשׁר נתתה לנו כאשׁר נשׁבעת לאבתינו ארץ זבת חלב ודבשׁ׃
Deu 26:16
היום הזה יהוה אלהיך מצוך לעשׂות את החקים האלה ואת המשׁפטים ושׁמרת ועשׂית אותם בכל לבבך ובכל נפשׁך׃
Deu 26:17
את יהוה האמרת היום להיות לך לאלהים וללכת בדרכיו ולשׁמר חקיו ומצותיו ומשׁפטיו ולשׁמע בקלו׃
Deu 26:18
ויהוה האמירך היום להיות לו לעם סגלה כאשׁר דבר לך ולשׁמר כל מצותיו׃
Deu 26:19
ולתתך עליון על כל הגוים אשׁר עשׂה לתהלה ולשׁם ולתפארת ולהיתך עם קדשׁ ליהוה אלהיך כאשׁר דבר׃

تابِع بَنْد - بشارة بَيَان