اليونانية والعبرية الكتاب المقدس
EZEKIEL 46

Eze 46:1
כה אמר אדני יהוה שׁער החצר הפנימית הפנה קדים יהיה סגור שׁשׁת ימי המעשׂה וביום השׁבת יפתח וביום החדשׁ יפתח׃
Eze 46:2
ובא הנשׂיא דרך אולם השׁער מחוץ ועמד על מזוזת השׁער ועשׂו הכהנים את עולתו ואת שׁלמיו והשׁתחוה על מפתן השׁער ויצא והשׁער לא יסגר עד הערב׃
Eze 46:3
והשׁתחוו עם הארץ פתח השׁער ההוא בשׁבתות ובחדשׁים לפני יהוה׃
Eze 46:4
והעלה אשׁר יקרב הנשׂיא ליהוה ביום השׁבת שׁשׁה כבשׂים תמימם ואיל תמים׃
Eze 46:5
ומנחה איפה לאיל ולכבשׂים מנחה מתת ידו ושׁמן הין לאיפה׃
Eze 46:6
וביום החדשׁ פר בן בקר תמימם ושׁשׁת כבשׂם ואיל תמימם יהיו׃
Eze 46:7
ואיפה לפר ואיפה לאיל יעשׂה מנחה ולכבשׂים כאשׁר תשׂיג ידו ושׁמן הין לאיפה׃
Eze 46:8
ובבוא הנשׂיא דרך אולם השׁער יבוא ובדרכו יצא׃
Eze 46:9
ובבוא עם הארץ לפני יהוה במועדים הבא דרך שׁער צפון להשׁתחות יצא דרך שׁער נגב והבא דרך שׁער נגב יצא דרך שׁער צפונה לא ישׁוב דרך השׁער אשׁר בא בו כי נכחו יצאו׃
Eze 46:10
והנשׂיא בתוכם בבואם יבוא ובצאתם יצאו׃
Eze 46:11
ובחגים ובמועדים תהיה המנחה איפה לפר ואיפה לאיל ולכבשׂים מתת ידו ושׁמן הין לאיפה׃
Eze 46:12
וכי יעשׂה הנשׂיא נדבה עולה או שׁלמים נדבה ליהוה ופתח לו את השׁער הפנה קדים ועשׂה את עלתו ואת שׁלמיו כאשׁר יעשׂה ביום השׁבת ויצא וסגר את השׁער אחרי צאתו׃
Eze 46:13
וכבשׂ בן שׁנתו תמים תעשׂה עולה ליום ליהוה בבקר בבקר תעשׂה אתו׃
Eze 46:14
ומנחה תעשׂה עליו בבקר בבקר שׁשׁית האיפה ושׁמן שׁלישׁית ההין לרס את הסלת מנחה ליהוה חקות עולם תמיד׃
Eze 46:15
ועשׂו את הכבשׂ ואת המנחה ואת השׁמן בבקר בבקר עולת תמיד׃
Eze 46:16
כה אמר אדני יהוה כי יתן הנשׂיא מתנה לאישׁ מבניו נחלתו היא לבניו תהיה אחזתם היא בנחלה׃
Eze 46:17
וכי יתן מתנה מנחלתו לאחד מעבדיו והיתה לו עד שׁנת הדרור ושׁבת לנשׂיא אך נחלתו בניו להם תהיה׃
Eze 46:18
ולא יקח הנשׂיא מנחלת העם להונתם מאחזתם מאחזתו ינחל את בניו למען אשׁר לא יפצו עמי אישׁ מאחזתו׃
Eze 46:19
ויביאני במבוא אשׁר על כתף השׁער אל הלשׁכות הקדשׁ אל הכהנים הפנות צפונה והנה שׁם מקום בירכתם ימה׃
Eze 46:20
ויאמר אלי זה המקום אשׁר יבשׁלו שׁם הכהנים את האשׁם ואת החטאת אשׁר יאפו את המנחה לבלתי הוציא אל החצר החיצונה לקדשׁ את העם׃
Eze 46:21
ויוציאני אל החצר החיצנה ויעבירני אל ארבעת מקצועי החצר והנה חצר במקצע החצר חצר במקצע החצר׃
Eze 46:22
בארבעת מקצעות החצר חצרות קטרות ארבעים ארך ושׁלשׁים רחב מדה אחת לארבעתם מהקצעות׃
Eze 46:23
וטור סביב בהם סביב לארבעתם ומבשׁלות עשׂוי מתחת הטירות סביב׃
Eze 46:24
ויאמר אלי אלה בית המבשׁלים אשׁר יבשׁלו שׁם משׁרתי הבית את זבח העם׃

تابِع بَنْد - بشارة بَيَان