Кайгыга чөккөн күнү Кудайдан жардам сурап сыйынуу

85:1 Дөөттүн забуру. Теңир, мага кулак сал, мени ук, анткени мен жардымын жана жакырмын.

85:2 Жанымды сактап кал, анткени мен Сенин алдыңда коркуп турам. Кудайым, Сага таянган кулуңду куткар.

85:3 Мага ырайым кыл, Теңирим, анткени мен Сени күн сайын чакырам.

85:4 өз кулуңду кубандыр, анткени мен өзүмдүн жанымды Сенин алдыңа алып келем.

85:5 Анткени Сен, Теңирим, ырайымдуусуң жана боорукерсиң, Сени чакыргандардын баарына көп жолу ырайым кыласың.

85:6 Менин сыйынуумду ук, Теңир, менин жалынуума кулак сал.

85:7 Кайгыга баткан күнү Сени чакырам, анткени Сен мени угасың.

85:8 Кудайлардын арасында Сендей жок, Теңирим, Сенин иштериңдей иш жок.

85:9 Сен жараткан элдердин баары Сенин алдыңа келип таазим кылышат, Теңирим, Сенин ысымыңды даңкташат.

85:10 Анткени Сен улуусуң, кереметтерди жасайсың, Сен жалгыз Кудайсың.

85:11 Сенин чындык жолуңда жүрүшүм үчүн, мени өз жолуңа сал, Теңирим. Сенин ысымыңдан коркуп турушум үчүн, жүрөгүмдү бекемде.

85:12 Сени чын жүрөгүмдөн мактайм, Теңирим, Сенин ысымыңды түбөлүккө даңктайм.

85:13 Анткени Сен мага улуу ырайым көрсөттүң. Сен менин жанымды өлгөндөр жаткан жайдын түпкүрүнөн куткарып алдың.

85:14 Кудайым! Текеберлер мага каршы чыгышты, козголоңчулар тобу мени өлтүргүсү келип издеп жүрөт. Алар Сени үстерине алышпайт.

85:15 Бирок Сен, Теңирим, Кудайым, кайрымдуусуң, ырайымдуусуң, чыдамдуусуң, абдан боорукерсиң, адилеттүүсүң.

85:16 Мага назарыңды сал, мага ырайым кыл. өз кулуңа өз күчүңдү бер, өз күңэңдүн уулун куткар.

85:17 Мага ырайым кылганыңды билдирген белги бер, мени жек көргөндөр көрүп, уятка калышсын, анткени Сен, Теңирим, мага жардам бердиң, мени соороттуң.

СЛЕДУЮЩАЯ ГЛАВА - ИНДЕКС БИБЛИИ И ПОИСК