PREVIOUS CHAPTER - NEXT CHAPTER - HELP - GR VIDEOS - GR YOUTUBE - TWITTER - SD1 YOUTUBE    

Eze 30:1
ויהי דבר יהוה אלי לאמר׃
Eze 30:2
בן אדם הנבא ואמרת כה אמר אדני יהוה הילילו הה ליום׃
Eze 30:3
כי קרוב יום וקרוב יום ליהוה יום ענן עת גוים יהיה׃
Eze 30:4
ובאה חרב במצרים והיתה חלחלה בכושׁ בנפל חלל במצרים ולקחו המונה ונהרסו יסודתיה׃
Eze 30:5
כושׁ ופוט ולוד וכל הערב וכוב ובני ארץ הברית אתם בחרב יפלו׃
Eze 30:6
כה אמר יהוה ונפלו סמכי מצרים וירד גאון עזה ממגדל סונה בחרב יפלו בה  נאם  אדני יהוה׃
Eze 30:7
ונשׁמו בתוך ארצות נשׁמות ועריו בתוך ערים נחרבות תהיינה׃
Eze 30:8
וידעו כי אני יהוה בתתי אשׁ במצרים ונשׁברו כל עזריה׃
Eze 30:9
ביום ההוא יצאו מלאכים מלפני בצים להחריד את כושׁ בטח והיתה חלחלה בהם  ביום  מצרים כי הנה באה׃
Eze 30:10
כה אמר אדני יהוה והשׁבתי את המון מצרים ביד נבוכדראצר מלך בבל׃
Eze 30:11
הוא ועמו אתו עריצי גוים מובאים לשׁחת הארץ והריקו חרבותם על מצרים ומלאו את הארץ חלל׃
Eze 30:12
ונתתי יארים חרבה ומכרתי את הארץ ביד רעים והשׁמתי ארץ ומלאה ביד זרים אני יהוה דברתי׃
Eze 30:13
כה אמר אדני יהוה והאבדתי  גלולים והשׁבתי אלילים מנף ונשׂיא מארץ מצרים לא יהיה עוד ונתתי יראה בארץ מצרים׃
Eze 30:14
והשׁמתי את פתרוס ונתתי אשׁ בצען ועשׂיתי שׁפטים בנא׃
Eze 30:15
ושׁפכתי חמתי על סין מעוז מצרים והכרתי את המון נא׃
Eze 30:16
ונתתי אשׁ במצרים חול תחיל סין ונא תהיה להבקע ונף צרי יומם׃
Eze 30:17
בחורי און ופי  בסת  בחרב יפלו והנה בשׁבי תלכנה׃
Eze 30:18
ובתחפנחס חשׂך היום בשׁברי שׁם את מטות מצרים ונשׁבת בה  גאון  עזה היא ענן יכסנה ובנותיה בשׁבי תלכנה׃
Eze 30:19
ועשׂיתי שׁפטים במצרים וידעו כי אני יהוה׃
Eze 30:20
ויהי באחת עשׂרה שׁנה בראשׁון בשׁבעה לחדשׁ היה דבר יהוה אלי לאמר׃
Eze 30:21
בן אדם את זרוע פרעה מלך מצרים שׁברתי והנה לא חבשׁה לתת רפאות לשׂום חתול לחבשׁה לחזקה לתפשׂ בחרב׃
Eze 30:22
לכן כה אמר אדני יהוה הנני אל פרעה מלך מצרים ושׁברתי את זרעתיו את החזקה ואת הנשׁברת והפלתי את החרב מידו׃
Eze 30:23
והפצותי את מצרים בגוים וזריתם בארצות׃
Eze 30:24
וחזקתי את זרעות מלך בבל ונתתי את חרבי בידו ושׁברתי את זרעות פרעה ונאק נאקות חלל לפניו׃
Eze 30:25
והחזקתי את זרעות מלך בבל וזרעות פרעה תפלנה וידעו כי אני יהוה בתתי חרבי ביד מלך בבל ונטה אותה אל ארץ מצרים׃
Eze 30:26
והפצותי את מצרים בגוים וזריתי אותם בארצות וידעו כי אני יהוה׃

GOTO NEXT CHAPTER - HEBREW & GREEK INDEX & SEARCH