PREVIOUS CHAPTER - NEXT CHAPTER - HELP - GR VIDEOS - GR YOUTUBE - TWITTER - SD1 YOUTUBE    

Isa 53:1
מי האמין לשׁמעתנו וזרוע יהוה על מי נגלתה׃
Isa 53:2
ויעל כיונק לפניו וכשׁרשׁ מארץ ציה לא תאר לו  ולא  הדר ונראהו ולא מראה ונחמדהו׃
Isa 53:3
נבזה וחדל אישׁים אישׁ מכאבות וידוע חלי וכמסתר פנים ממנו נבזה ולא חשׁבנהו׃
Isa 53:4
אכן חלינו הוא נשׂא ומכאבינו סבלם ואנחנו חשׁבנהו נגוע מכה אלהים ומענה׃
Isa 53:5
והוא מחלל מפשׁענו מדכא מעונתינו מוסר שׁלומנו עליו ובחברתו נרפא׃
Isa 53:6
כלנו כצאן תעינו אישׁ לדרכו פנינו ויהוה הפגיע בו  את  עון כלנו׃
Isa 53:7
נגשׂ והוא נענה ולא יפתח פיו כשׂה לטבח יובל וכרחל לפני גזזיה נאלמה ולא יפתח פיו׃
Isa 53:8
מעצר וממשׁפט לקח ואת דורו מי ישׂוחח כי נגזר מארץ חיים מפשׁע עמי נגע׃
Isa 53:9
ויתן את רשׁעים קברו ואת עשׁיר במתיו על לא חמס עשׂה ולא מרמה בפיו׃
Isa 53:10
ויהוה חפץ דכאו החלי אם תשׂים אשׁם נפשׁו יראה זרע יאריך ימים וחפץ יהוה בידו יצלח׃
Isa 53:11
מעמל נפשׁו יראה ישׂבע בדעתו יצדיק צדיק עבדי לרבים ועונתם הוא יסבל׃
Isa 53:12
לכן אחלק לו  ברבים  ואת עצומים יחלק שׁלל תחת אשׁר הערה למות נפשׁו ואת פשׁעים נמנה והוא חטא רבים נשׂא ולפשׁעים יפגיע׃

GOTO NEXT CHAPTER - HEBREW & GREEK INDEX & SEARCH