PREVIOUS CHAPTER - NEXT CHAPTER - HELP - GR VIDEOS - GR YOUTUBE - TWITTER - SD1 YOUTUBE    

1Sa 31:1
ופלשׁתים נלחמים בישׂראל וינסו אנשׁי ישׂראל מפני פלשׁתים ויפלו חללים בהר הגלבע׃
1Sa 31:2
וידבקו פלשׁתים את שׁאול ואת בניו ויכו פלשׁתים את יהונתן ואת אבינדב  ואת  מלכי  שׁוע בני שׁאול׃
1Sa 31:3
ותכבד המלחמה אל שׁאול וימצאהו המורים אנשׁים בקשׁת ויחל מאד מהמורים׃
1Sa 31:4
ויאמר שׁאול לנשׂא כליו שׁלף חרבך ודקרני בה  פן  יבואו  הערלים האלה ודקרני והתעללו בי  ולא  אבה  נשׂא  כליו  כי  ירא  מאד  ויקח  שׁאול  את  החרב  ויפל  עליה׃  
1Sa 31:5
וירא נשׂא כליו כי מת שׁאול ויפל גם הוא על חרבו וימת עמו׃
1Sa 31:6
וימת שׁאול ושׁלשׁת בניו ונשׂא כליו גם כל אנשׁיו ביום ההוא יחדו׃
1Sa 31:7
ויראו אנשׁי ישׂראל אשׁר בעבר העמק ואשׁר בעבר הירדן כי נסו אנשׁי ישׂראל וכי מתו שׁאול ובניו ויעזבו את הערים וינסו ויבאו פלשׁתים וישׁבו׃
1Sa 31:8
ויהי ממחרת ויבאו פלשׁתים לפשׁט את החללים וימצאו את שׁאול ואת שׁלשׁת בניו נפלים בהר הגלבע׃
1Sa 31:9
ויכרתו את ראשׁו ויפשׁיטו את כליו וישׁלחו בארץ פלשׁתים סביב לבשׂר בית עצביהם ואת העם׃
1Sa 31:10
וישׂמו את כליו בית עשׁתרות ואת גויתו תקעו בחומת בית  שׁן׃  
1Sa 31:11
וישׁמעו אליו ישׁבי יבישׁ גלעד את אשׁר עשׂו פלשׁתים לשׁאול׃
1Sa 31:12
ויקומו כל אישׁ חיל וילכו כל הלילה ויקחו את גוית שׁאול ואת גוית בניו מחומת בית  שׁן  ויבאו  יבשׁה  וישׂרפו אתם שׁם׃
1Sa 31:13
ויקחו את עצמתיהם ויקברו תחת האשׁל ביבשׁה ויצמו שׁבעת ימים׃

GOTO NEXT CHAPTER - HEBREW & GREEK INDEX & SEARCH