PREVIOUS CHAPTER - NEXT CHAPTER - HELP - GR VIDEOS - GR YOUTUBE - TWITTER - SD1 YOUTUBE    

Isa 38:1
בימים ההם חלה חזקיהו למות ויבוא אליו ישׁעיהו בן אמוץ הנביא ויאמר אליו כה אמר יהוה צו לביתך כי מת אתה ולא תחיה׃
Isa 38:2
ויסב חזקיהו פניו אל הקיר ויתפלל אל יהוה׃
Isa 38:3
ויאמר אנה יהוה זכר נא את אשׁר התהלכתי לפניך באמת ובלב שׁלם והטוב בעיניך עשׂיתי ויבך חזקיהו בכי גדול׃
Isa 38:4
ויהי דבר יהוה אל ישׁעיהו לאמר׃
Isa 38:5
הלוך ואמרת אל חזקיהו כה אמר יהוה אלהי דוד אביך  שׁמעתי את תפלתך ראיתי את דמעתך הנני יוסף על ימיך חמשׁ עשׂרה שׁנה׃
Isa 38:6
ומכף מלך אשׁור אצילך ואת העיר הזאת וגנותי על העיר הזאת׃
Isa 38:7
וזה לך  האות  מאת יהוה אשׁר יעשׂה יהוה את הדבר הזה אשׁר דבר׃
Isa 38:8
הנני משׁיב את צל המעלות אשׁר ירדה במעלות אחז בשׁמשׁ אחרנית עשׂר מעלות ותשׁב השׁמשׁ עשׂר מעלות במעלות אשׁר ירדה׃
Isa 38:9
מכתב לחזקיהו מלך יהודה בחלתו ויחי מחליו׃
Isa 38:10
אני אמרתי בדמי ימי אלכה בשׁערי שׁאול פקדתי יתר שׁנותי׃
Isa 38:11
אמרתי לא אראה יה יה בארץ החיים לא אביט אדם עוד עם יושׁבי חדל׃
Isa 38:12
דורי נסע ונגלה מני כאהל רעי קפדתי כארג חיי מדלה יבצעני מיום עד לילה תשׁלימני׃
Isa 38:13
שׁויתי עד בקר כארי כן ישׁבר כל עצמותי מיום עד לילה תשׁלימני׃
Isa 38:14
כסוס עגור כן אצפצף אהגה כיונה דלו עיני למרום אדני עשׁקה לי  ערבני׃  
Isa 38:15
מה אדבר ואמר לי  והוא  עשׂה אדדה כל שׁנותי על מר נפשׁי׃
Isa 38:16
אדני עליהם יחיו ולכל בהן  חיי  רוחי ותחלימני והחיני׃
Isa 38:17
הנה לשׁלום מר לי  מר  ואתה חשׁקת נפשׁי משׁחת בלי כי השׁלכת אחרי גוך כל חטאי׃
Isa 38:18
כי לא שׁאול תודך מות יהללך לא ישׂברו יורדי בור אל אמתך׃
Isa 38:19
חי חי הוא יודך כמוני היום אב  לבנים יודיע אל אמתך׃
Isa 38:20
יהוה להושׁיעני ונגנותי ננגן כל ימי חיינו על בית יהוה׃
Isa 38:21
ויאמר ישׁעיהו ישׂאו דבלת תאנים וימרחו על השׁחין ויחי׃
Isa 38:22
ויאמר חזקיהו מה אות כי אעלה בית יהוה׃

GOTO NEXT CHAPTER - HEBREW & GREEK INDEX & SEARCH