PREVIOUS CHAPTER - NEXT CHAPTER - HELP - GR VIDEOS - GR YOUTUBE - TWITTER - SD1 YOUTUBE    

Isa 62:1
למען ציון לא אחשׁה ולמען ירושׁלם לא אשׁקוט עד יצא כנגה צדקה וישׁועתה כלפיד יבער׃
Isa 62:2
וראו גוים צדקך וכל מלכים כבודך וקרא לך  שׁם  חדשׁ אשׁר פי יהוה יקבנו׃
Isa 62:3
והיית עטרת תפארת ביד יהוה וצנוף מלוכה בכף אלהיך׃
Isa 62:4
לא יאמר לך  עוד  עזובה ולארצך לא יאמר עוד שׁממה כי לך  יקרא  חפצי  בה ולארצך בעולה כי חפץ יהוה בך  וארצך  תבעל׃
Isa 62:5
כי יבעל בחור בתולה יבעלוך בניך ומשׂושׂ חתן על כלה ישׂישׂ עליך אלהיך׃
Isa 62:6
על חומתיך ירושׁלם הפקדתי שׁמרים כל היום וכל הלילה תמיד לא יחשׁו המזכרים את יהוה אל דמי׃
Isa 62:7
ואל תתנו דמי לו  עד  יכונן ועד ישׂים את ירושׁלם תהלה בארץ׃
Isa 62:8
נשׁבע יהוה בימינו ובזרוע עזו אם אתן את דגנך עוד מאכל לאיביך ואם ישׁתו בני נכר תירושׁך אשׁר יגעת׃
Isa 62:9
כי מאספיו יאכלהו והללו את יהוה ומקבציו ישׁתהו בחצרות קדשׁי׃
Isa 62:10
עברו עברו בשׁערים פנו דרך העם סלו סלו המסלה סקלו מאבן  הרימו נס על העמים׃
Isa 62:11
הנה יהוה השׁמיע אל קצה הארץ אמרו לבת ציון הנה ישׁעך בא הנה שׂכרו אתו ופעלתו לפניו׃
Isa 62:12
וקראו להם עם הקדשׁ גאולי יהוה ולך  יקרא  דרושׁה עיר לא נעזבה׃

GOTO NEXT CHAPTER - HEBREW & GREEK INDEX & SEARCH