PREVIOUS CHAPTER - NEXT CHAPTER - HELP - GR VIDEOS - GR YOUTUBE - TWITTER - SD1 YOUTUBE    

Jos 20:1
וידבר יהוה אל יהושׁע לאמר׃
Jos 20:2
דבר אל בני ישׂראל לאמר תנו לכם  את  ערי  המקלט  אשׁר  דברתי  אליכם  ביד  משׁה׃  
Jos 20:3
לנוס שׁמה רוצח מכה נפשׁ בשׁגגה בבלי דעת והיו לכם  למקלט  מגאל  הדם׃  
Jos 20:4
ונס אל אחת מהערים האלה ועמד פתח שׁער העיר ודבר באזני זקני העיר ההיא את דבריו ואספו אתו העירה אליהם ונתנו לו  מקום  וישׁב  עמם׃  
Jos 20:5
וכי ירדף גאל הדם אחריו ולא יסגרו את הרצח בידו כי בבלי דעת הכה את רעהו ולא שׂנא הוא לו  מתמול  שׁלשׁום׃
Jos 20:6
וישׁב בעיר ההיא עד עמדו לפני העדה למשׁפט עד מות הכהן הגדול אשׁר יהיה בימים ההם אז ישׁוב הרוצח ובא אל עירו ואל ביתו אל העיר אשׁר נס משׁם׃
Jos 20:7
ויקדשׁו את קדשׁ בגליל בהר נפתלי ואת שׁכם בהר אפרים ואת קרית  ארבע  היא  חברון  בהר  יהודה׃
Jos 20:8
ומעבר לירדן יריחו מזרחה נתנו את בצר במדבר במישׁר ממטה ראובן ואת ראמת בגלעד ממטה גד ואת גלון בבשׁן ממטה מנשׁה׃
Jos 20:9
אלה היו ערי המועדה לכל בני ישׂראל ולגר הגר בתוכם לנוס שׁמה כל מכה נפשׁ בשׁגגה ולא ימות ביד גאל הדם עד עמדו לפני העדה׃

GOTO NEXT CHAPTER - HEBREW & GREEK INDEX & SEARCH