PREVIOUS CHAPTER - NEXT CHAPTER - HELP - GR VIDEOS - GR YOUTUBE - TWITTER - SD1 YOUTUBE    

Exo 6:1
ויאמר יהוה אל משׁה עתה תראה אשׁר אעשׂה לפרעה כי ביד חזקה ישׁלחם וביד חזקה יגרשׁם מארצו׃
Exo 6:2
וידבר אלהים אל משׁה ויאמר אליו אני יהוה׃
Exo 6:3
וארא אל אברהם  אל  יצחק  ואל  יעקב  באל  שׁדי  ושׁמי  יהוה  לא  נודעתי׃
Exo 6:4
וגם הקמתי את בריתי אתם לתת להם  את  ארץ  כנען  את  ארץ  מגריהם אשׁר גרו׃
Exo 6:5
וגם אני שׁמעתי את נאקת בני ישׂראל אשׁר מצרים מעבדים אתם ואזכר את בריתי׃
Exo 6:6
לכן אמר לבני ישׂראל אני יהוה והוצאתי אתכם מתחת סבלת מצרים והצלתי אתכם מעבדתם וגאלתי אתכם בזרוע נטויה ובשׁפטים גדלים׃
Exo 6:7
ולקחתי אתכם לי  לעם  והייתי לכם  לאלהים  וידעתם כי אני יהוה אלהיכם המוציא אתכם מתחת סבלות מצרים׃
Exo 6:8
והבאתי אתכם אל הארץ אשׁר נשׂאתי את ידי לתת אתה לאברהם  ליצחק  וליעקב ונתתי אתה לכם  מורשׁה  אני  יהוה׃  
Exo 6:9
וידבר משׁה כן אל בני ישׂראל ולא שׁמעו אל משׁה מקצר רוח ומעבדה קשׁה׃
Exo 6:10
וידבר יהוה אל משׁה לאמר׃
Exo 6:11
בא דבר אל פרעה מלך מצרים וישׁלח את בני ישׂראל מארצו׃
Exo 6:12
וידבר משׁה לפני יהוה לאמר הן בני ישׂראל לא שׁמעו אלי ואיך ישׁמעני פרעה ואני ערל שׂפתים׃
Exo 6:13
וידבר יהוה אל משׁה ואל אהרן ויצום אל בני ישׂראל ואל פרעה מלך מצרים להוציא את בני ישׂראל מארץ מצרים׃
Exo 6:14
אלה ראשׁי בית אבתם  בני  ראובן  בכר  ישׂראל חנוך ופלוא חצרן וכרמי אלה משׁפחת ראובן׃
Exo 6:15
ובני שׁמעון ימואל וימין ואהד ויכין וצחר ושׁאול בן הכנענית אלה משׁפחת שׁמעון׃
Exo 6:16
ואלה שׁמות בני לוי לתלדתם גרשׁון וקהת ומררי ושׁני חיי לוי שׁבע ושׁלשׁים ומאת שׁנה׃
Exo 6:17
בני גרשׁון לבני ושׁמעי למשׁפחתם׃
Exo 6:18
ובני קהת עמרם ויצהר וחברון ועזיאל ושׁני חיי קהת שׁלשׁ ושׁלשׁים ומאת שׁנה׃
Exo 6:19
ובני מררי מחלי ומושׁי אלה משׁפחת הלוי לתלדתם׃
Exo 6:20
ויקח עמרם את יוכבד דדתו לו  לאשׁה  ותלד  לו  את  אהרן  ואת  משׁה  ושׁני  חיי  עמרם  שׁבע  ושׁלשׁים ומאת שׁנה׃
Exo 6:21
ובני יצהר קרח ונפג וזכרי׃
Exo 6:22
ובני עזיאל מישׁאל ואלצפן וסתרי׃
Exo 6:23
ויקח אהרן את אלישׁבע בת עמינדב אחות נחשׁון לו  לאשׁה  ותלד  לו  את  נדב  ואת  אביהוא  את  אלעזר  ואת  איתמר׃
Exo 6:24
ובני קרח אסיר ואלקנה ואביאסף  אלה  משׁפחת הקרחי׃
Exo 6:25
ואלעזר בן אהרן לקח לו  מבנות  פוטיאל לו  לאשׁה  ותלד  לו  את  פינחס  אלה  ראשׁי  אבות  הלוים  למשׁפחתם׃
Exo 6:26
הוא אהרן ומשׁה אשׁר אמר יהוה להם  הוציאו  את  בני  ישׂראל מארץ מצרים על צבאתם׃
Exo 6:27
הם המדברים אל פרעה מלך מצרים להוציא את בני ישׂראל ממצרים הוא משׁה ואהרן׃
Exo 6:28
ויהי ביום דבר יהוה אל משׁה בארץ מצרים׃
Exo 6:29
וידבר יהוה אל משׁה לאמר אני יהוה דבר אל פרעה מלך מצרים את כל אשׁר אני דבר אליך׃
Exo 6:30
ויאמר משׁה לפני יהוה הן אני ערל שׂפתים ואיך ישׁמע אלי פרעה׃

GOTO NEXT CHAPTER - HEBREW & GREEK INDEX & SEARCH