PREVIOUS CHAPTER - NEXT CHAPTER - HELP - GR VIDEOS - GR YOUTUBE - TWITTER - SD1 YOUTUBE    

Ezr 4:1
וישׁמעו צרי יהודה ובנימן כי בני הגולה בונים היכל ליהוה אלהי ישׂראל׃
Ezr 4:2
ויגשׁו אל זרבבל ואל ראשׁי האבות  ויאמרו להם נבנה עמכם כי ככם  נדרושׁ  לאלהיכם ולא אנחנו זבחים מימי אסר  חדן  מלך  אשׁור  המעלה  אתנו  פה׃  
Ezr 4:3
ויאמר להם  זרבבל  וישׁוע ושׁאר ראשׁי האבות  לישׂראל לא לכם  ולנו  לבנות בית לאלהינו כי אנחנו יחד נבנה ליהוה אלהי ישׂראל כאשׁר צונו המלך כורשׁ מלך פרס׃
Ezr 4:4
ויהי עם הארץ מרפים ידי עם יהודה ומבלהים אותם לבנות׃
Ezr 4:5
וסכרים עליהם יועצים להפר עצתם כל ימי כורשׁ מלך פרס ועד מלכות דריושׁ מלך פרס׃
Ezr 4:6
ובמלכות אחשׁורושׁ בתחלת מלכותו כתבו שׂטנה על ישׁבי יהודה וירושׁלם׃
Ezr 4:7
ובימי ארתחשׁשׂתא כתב בשׁלם מתרדת טבאל ושׁאר כנותו על ארתחשׁשׂתא מלך פרס וכתב הנשׁתון כתוב ארמית ומתרגם ארמית׃
Ezr 4:8
רחום בעל טעם ושׁמשׁי ספרא כתבו אגרה חדה על ירושׁלם לארתחשׁשׂתא מלכא כנמא׃
Ezr 4:9
אדין רחום בעל טעם ושׁמשׁי ספרא ושׁאר כנותהון דיניא ואפרסתכיא טרפליא אפרסיא ארכוי בבליא שׁושׁנכיא דהוא עלמיא׃
Ezr 4:10
ושׁאר אמיא די הגלי אסנפר רבא ויקירא והותב המו בקריה די שׁמרין ושׁאר עבר נהרה וכענת׃
Ezr 4:11
דנה פרשׁגן אגרתא די שׁלחו עלוהי על ארתחשׁשׂתא מלכא עבדיך אנשׁ עבר נהרה וכענת׃
Ezr 4:12
ידיע להוא למלכא די יהודיא די סלקו מן לותך עלינא אתו לירושׁלם קריתא מרדתא ובאישׁתא בנין ושׁורי אשׁכללו ואשׁיא יחיטו׃
Ezr 4:13
כען ידיע להוא למלכא די הן קריתא דך תתבנא ושׁוריה ישׁתכללון מנדה בלו והלך לא ינתנון ואפתם מלכים תהנזק׃
Ezr 4:14
כען כל קבל די מלח היכלא מלחנא וערות מלכא לא אריך לנא  למחזא  על  דנה  שׁלחנא והודענא למלכא׃
Ezr 4:15
די יבקר בספר דכרניא די אבהתך  ותהשׁכח בספר דכרניא ותנדע די קריתא דך קריא מרדא ומהנזקת מלכין ומדנן ואשׁתדור עבדין בגוה מן יומת עלמא על דנה קריתא דך החרבת׃
Ezr 4:16
מהודעין אנחנה למלכא די הן קריתא דך תתבנא ושׁוריה ישׁתכללון לקבל דנה חלק בעבר נהרא לא איתי׃
Ezr 4:17
פתגמא שׁלח מלכא על רחום בעל טעם ושׁמשׁי ספרא ושׁאר כנותהון די יתבין בשׁמרין ושׁאר עבר נהרה שׁלם וכעת׃
Ezr 4:18
נשׁתונא די שׁלחתון עלינא מפרשׁ קרי קדמי׃
Ezr 4:19
ומני שׂים טעם ובקרו והשׁכחו די קריתא דך מן יומת עלמא על מלכין מתנשׂאה ומרד ואשׁתדור מתעבד׃
Ezr 4:20
ומלכין תקיפין הוו על ירושׁלם ושׁליטין בכל עבר נהרה ומדה בלו והלך מתיהב׃
Ezr 4:21
כען שׂימו טעם לבטלא גבריא אלך וקריתא דך לא תתבנא עד מני טעמא יתשׂם׃
Ezr 4:22
וזהירין הוו שׁלו למעבד על דנה למה ישׂגא חבלא להנזקת מלכין׃
Ezr 4:23
אדין מן די פרשׁגן נשׁתונא די ארתחשׁשׂתא מלכא קרי קדם רחום ושׁמשׁי ספרא וכנותהון אזלו בבהילו לירושׁלם על יהודיא ובטלו המו באדרע וחיל׃
Ezr 4:24
באדין בטלת עבידת בית אלהא די בירושׁלם והות בטלא עד שׁנת תרתין למלכות דריושׁ מלך פרס׃

GOTO NEXT CHAPTER - HEBREW & GREEK INDEX & SEARCH