PREVIOUS CHAPTER - NEXT CHAPTER - HELP - GR VIDEOS - GR YOUTUBE - TWITTER - SD1 YOUTUBE    

Jer 6:1
העזו בני בנימן מקרב ירושׁלם ובתקוע תקעו שׁופר ועל בית  הכרם  שׂאו משׂאת כי רעה נשׁקפה מצפון ושׁבר גדול׃
Jer 6:2
הנוה והמענגה דמיתי בת ציון׃
Jer 6:3
אליה יבאו רעים ועדריהם תקעו עליה אהלים סביב רעו אישׁ את ידו׃
Jer 6:4
קדשׁו עליה מלחמה קומו ונעלה בצהרים אוי לנו  כי  פנה היום כי ינטו צללי ערב׃
Jer 6:5
קומו ונעלה בלילה ונשׁחיתה ארמנותיה׃
Jer 6:6
כי כה אמר יהוה צבאות כרתו עצה ושׁפכו על ירושׁלם סללה היא העיר הפקד כלה עשׁק בקרבה׃
Jer 6:7
כהקיר בור מימיה כן הקרה רעתה חמס ושׁד ישׁמע בה  על  פני תמיד חלי ומכה׃
Jer 6:8
הוסרי ירושׁלם פן תקע נפשׁי ממך פן אשׂימך שׁממה ארץ לוא נושׁבה׃
Jer 6:9
כה אמר יהוה צבאות עולל יעוללו כגפן שׁארית ישׂראל השׁב ידך כבוצר על סלסלות׃
Jer 6:10
על מי אדברה ואעידה וישׁמעו הנה ערלה אזנם ולא יוכלו להקשׁיב הנה דבר יהוה היה להם  לחרפה  לא  יחפצו׃
Jer 6:11
ואת חמת יהוה מלאתי נלאיתי הכיל שׁפך על עולל בחוץ ועל סוד בחורים יחדו כי גם אישׁ עם אשׁה ילכדו זקן עם מלא ימים׃
Jer 6:12
ונסבו בתיהם לאחרים שׂדות ונשׁים יחדו כי אטה את ידי על ישׁבי הארץ נאם יהוה׃
Jer 6:13
כי מקטנם ועד גדולם כלו בוצע בצע ומנביא ועד כהן כלו עשׂה שׁקר׃
Jer 6:14
וירפאו את שׁבר עמי על נקלה לאמר שׁלום שׁלום ואין שׁלום׃
Jer 6:15
הבישׁו כי תועבה עשׂו גם בושׁ לא יבושׁו גם הכלים לא ידעו לכן יפלו בנפלים בעת פקדתים יכשׁלו אמר יהוה׃
Jer 6:16
כה אמר יהוה עמדו על דרכים וראו ושׁאלו לנתבות עולם אי זה דרך הטוב ולכו בה  ומצאו  מרגוע לנפשׁכם ויאמרו לא נלך׃
Jer 6:17
והקמתי עליכם צפים הקשׁיבו לקול שׁופר ויאמרו לא נקשׁיב׃
Jer 6:18
לכן שׁמעו הגוים ודעי עדה את אשׁר׃
Jer 6:19
שׁמעי הארץ הנה אנכי מביא רעה אל העם הזה פרי מחשׁבותם כי על דברי לא הקשׁיבו ותורתי וימאסו׃
Jer 6:20
למה זה לי  לבונה  משׁבא תבוא וקנה הטוב מארץ מרחק עלותיכם לא לרצון וזבחיכם לא ערבו׃
Jer 6:21
לכן כה אמר יהוה הנני נתן אל העם הזה מכשׁלים וכשׁלו בם  אבות  ובנים יחדו שׁכן ורעו יאבדו׃  
Jer 6:22
כה אמר יהוה הנה עם בא מארץ צפון וגוי גדול יעור מירכתי ארץ׃
Jer 6:23
קשׁת וכידון יחזיקו אכזרי הוא ולא ירחמו קולם כים יהמה ועל סוסים ירכבו ערוך כאישׁ למלחמה עליך בת ציון׃
Jer 6:24
שׁמענו את שׁמעו רפו ידינו צרה החזיקתנו חיל כיולדה׃
Jer 6:25
אל תצאי השׂדה ובדרך אל תלכי כי חרב לאיב מגור מסביב׃
Jer 6:26
בת עמי חגרי שׂק והתפלשׁי באפר אבל  יחיד עשׂי לך  מספד  תמרורים כי פתאם יבא השׁדד עלינו׃
Jer 6:27
בחון נתתיך בעמי מבצר ותדע ובחנת את דרכם׃
Jer 6:28
כלם סרי סוררים הלכי רכיל נחשׁת וברזל כלם משׁחיתים המה׃
Jer 6:29
נחר מפח מאשׁתם עפרת לשׁוא צרף צרוף ורעים לא נתקו׃
Jer 6:30
כסף נמאס קראו להם  כי  מאס יהוה׃

GOTO NEXT CHAPTER - HEBREW & GREEK INDEX & SEARCH