PREVIOUS CHAPTER - NEXT CHAPTER - HELP - GR VIDEOS - GR YOUTUBE - TWITTER - SD1 YOUTUBE    

Eze 25:1
ויהי דבר יהוה אלי לאמר׃
Eze 25:2
בן אדם שׂים פניך אל בני עמון והנבא עליהם׃
Eze 25:3
ואמרת לבני עמון שׁמעו דבר אדני יהוה כה אמר אדני יהוה יען אמרך האח אל מקדשׁי כי נחל ואל אדמת ישׂראל כי נשׁמה ואל בית יהודה כי הלכו בגולה׃
Eze 25:4
לכן הנני נתנך לבני קדם למורשׁה וישׁבו טירותיהם בך  ונתנו  בך  משׁכניהם המה יאכלו פריך והמה ישׁתו חלבך׃
Eze 25:5
ונתתי את רבה לנוה גמלים ואת בני עמון למרבץ צאן וידעתם כי אני יהוה׃
Eze 25:6
כי כה אמר אדני יהוה יען מחאך יד ורקעך ברגל ותשׂמח בכל שׁאטך בנפשׁ אל אדמת ישׂראל׃
Eze 25:7
לכן הנני נטיתי את ידי עליך ונתתיך לבג לגוים והכרתיך מן העמים והאבדתיך  מן  הארצות אשׁמידך וידעת כי אני יהוה׃
Eze 25:8
כה אמר אדני יהוה יען אמר מואב ושׂעיר הנה ככל הגוים בית יהודה׃
Eze 25:9
לכן הנני פתח את כתף מואב מהערים מעריו מקצהו צבי ארץ בית  הישׁימת בעל  מעון  וקריתמה׃
Eze 25:10
לבני קדם על בני עמון ונתתיה למורשׁה למען לא תזכר בני עמון בגוים׃
Eze 25:11
ובמואב אעשׂה שׁפטים וידעו כי אני יהוה׃
Eze 25:12
כה אמר אדני יהוה יען עשׂות אדום בנקם נקם לבית יהודה ויאשׁמו אשׁום ונקמו׃
Eze 25:13
לכן כה אמר אדני יהוה ונטתי ידי על אדום והכרתי ממנה אדם ובהמה ונתתיה חרבה מתימן ודדנה בחרב יפלו׃
Eze 25:14
ונתתי את נקמתי באדום ביד עמי ישׂראל ועשׂו באדום כאפי וכחמתי וידעו את נקמתי נאם אדני יהוה׃
Eze 25:15
כה אמר אדני יהוה יען עשׂות פלשׁתים בנקמה וינקמו נקם בשׁאט בנפשׁ למשׁחית איבת עולם׃
Eze 25:16
לכן כה אמר אדני יהוה הנני נוטה ידי על פלשׁתים והכרתי את כרתים והאבדתי  את  שׁארית חוף הים׃
Eze 25:17
ועשׂיתי בם  נקמות  גדלות בתוכחות חמה וידעו כי אני יהוה בתתי את נקמתי׃

GOTO NEXT CHAPTER - HEBREW & GREEK INDEX & SEARCH