PREVIOUS CHAPTER - NEXT CHAPTER - HELP - GR VIDEOS - GR YOUTUBE - TWITTER - SD1 YOUTUBE    

Isa 57:1
הצדיק אבד  ואין אישׁ שׂם על לב ואנשׁי חסד נאספים באין מבין כי מפני הרעה נאסף הצדיק׃
Isa 57:2
יבוא שׁלום ינוחו על משׁכבותם הלך נכחו׃
Isa 57:3
ואתם קרבו הנה בני עננה זרע מנאף ותזנה׃
Isa 57:4
על מי תתענגו על מי תרחיבו פה תאריכו לשׁון הלוא אתם ילדי פשׁע זרע שׁקר׃
Isa 57:5
הנחמים באלים תחת כל עץ רענן שׁחטי הילדים בנחלים תחת סעפי הסלעים׃
Isa 57:6
בחלקי נחל חלקך הם הם גורלך גם להם שׁפכת נסך העלית מנחה העל אלה אנחם׃
Isa 57:7
על הר גבה ונשׂא שׂמת משׁכבך גם שׁם עלית לזבח זבח׃
Isa 57:8
ואחר הדלת והמזוזה שׂמת זכרונך כי מאתי גלית ותעלי הרחבת משׁכבך ותכרת לך  מהם  אהבת משׁכבם יד חזית׃
Isa 57:9
ותשׁרי למלך בשׁמן ותרבי רקחיך ותשׁלחי צריך עד מרחק ותשׁפילי עד שׁאול׃
Isa 57:10
ברב דרכך יגעת לא אמרת נואשׁ חית ידך מצאת על כן לא חלית׃
Isa 57:11
ואת מי דאגת ותיראי כי תכזבי ואותי לא זכרת לא שׂמת על לבך הלא אני מחשׁה ומעלם ואותי לא תיראי׃
Isa 57:12
אני אגיד צדקתך ואת מעשׂיך ולא יועילוך׃
Isa 57:13
בזעקך יצילך קבוציך ואת כלם ישׂא רוח יקח הבל והחוסה בי  ינחל  ארץ ויירשׁ הר קדשׁי׃
Isa 57:14
ואמר סלו סלו פנו דרך הרימו מכשׁול מדרך עמי׃
Isa 57:15
כי כה אמר רם ונשׂא שׁכן עד וקדושׁ שׁמו מרום וקדושׁ אשׁכון ואת דכא ושׁפל רוח להחיות רוח שׁפלים ולהחיות לב נדכאים׃
Isa 57:16
כי לא לעולם אריב ולא לנצח אקצוף כי רוח מלפני יעטוף ונשׁמות אני עשׂיתי׃
Isa 57:17
בעון בצעו קצפתי ואכהו הסתר ואקצף וילך שׁובב בדרך לבו׃
Isa 57:18
דרכיו ראיתי וארפאהו ואנחהו ואשׁלם נחמים לו  ולאבליו׃  
Isa 57:19
בורא נוב שׂפתים שׁלום שׁלום לרחוק ולקרוב אמר יהוה ורפאתיו׃
Isa 57:20
והרשׁעים כים נגרשׁ כי השׁקט לא יוכל ויגרשׁו מימיו רפשׁ וטיט׃
Isa 57:21
אין שׁלום אמר אלהי לרשׁעים׃

GOTO NEXT CHAPTER - HEBREW & GREEK INDEX & SEARCH