PREVIOUS CHAPTER - NEXT CHAPTER - HELP - GR VIDEOS - GR YOUTUBE - TWITTER - SD1 YOUTUBE    

Jer 47:1
אשׁר היה דבר יהוה אל ירמיהו הנביא אל פלשׁתים בטרם יכה פרעה את עזה׃
Jer 47:2
כה אמר יהוה הנה מים עלים מצפון והיו לנחל שׁוטף וישׁטפו ארץ ומלואה עיר וישׁבי בה  וזעקו  האדם והילל כל יושׁב הארץ׃
Jer 47:3
מקול שׁעטת פרסות אביריו  מרעשׁ לרכבו המון גלגליו לא הפנו אבות  אל  בנים מרפיון ידים׃
Jer 47:4
על היום הבא לשׁדוד את כל פלשׁתים להכרית לצר ולצידון כל שׂריד עזר כי שׁדד יהוה את פלשׁתים שׁארית אי כפתור׃
Jer 47:5
באה קרחה אל עזה נדמתה אשׁקלון שׁארית עמקם עד מתי תתגודדי׃
Jer 47:6
הוי חרב ליהוה עד אנה לא תשׁקטי האספי אל תערך הרגעי ודמי׃
Jer 47:7
איך תשׁקטי ויהוה צוה לה  אל  אשׁקלון ואל חוף הים שׁם יעדה׃

GOTO NEXT CHAPTER - HEBREW & GREEK INDEX & SEARCH