PREVIOUS CHAPTER - NEXT CHAPTER - HELP - GR VIDEOS - GR YOUTUBE - TWITTER - SD1 YOUTUBE    

Zec 9:1
משׂא דבר יהוה בארץ חדרך ודמשׂק מנחתו כי ליהוה עין אדם וכל שׁבטי ישׂראל׃
Zec 9:2
וגם חמת תגבל בה  צר  וצידון כי חכמה מאד׃
Zec 9:3
ותבן צר מצור לה  ותצבר  כסף כעפר וחרוץ כטיט חוצות׃
Zec 9:4
הנה אדני יורשׁנה והכה בים חילה והיא באשׁ תאכל׃
Zec 9:5
תרא אשׁקלון ותירא ועזה ותחיל מאד ועקרון כי הבישׁ מבטה ואבד  מלך מעזה ואשׁקלון לא תשׁב׃
Zec 9:6
וישׁב ממזר באשׁדוד והכרתי גאון פלשׁתים׃
Zec 9:7
והסרתי דמיו מפיו ושׁקציו מבין שׁניו ונשׁאר גם הוא לאלהינו והיה כאלף ביהודה ועקרון כיבוסי׃
Zec 9:8
וחניתי לביתי מצבה מעבר ומשׁב ולא יעבר עליהם עוד נגשׂ כי עתה ראיתי בעיני׃
Zec 9:9
גילי מאד בת ציון הריעי בת ירושׁלם הנה מלכך יבוא לך  צדיק  ונושׁע הוא עני ורכב על חמור ועל עיר בן אתנות׃
Zec 9:10
והכרתי רכב מאפרים וסוס מירושׁלם ונכרתה קשׁת מלחמה ודבר שׁלום לגוים ומשׁלו מים עד ים ומנהר עד אפסי ארץ׃
Zec 9:11
גם את בדם בריתך שׁלחתי אסיריך מבור אין מים׃
Zec 9:12
שׁובו לבצרון אסירי התקוה גם היום מגיד משׁנה אשׁיב׃
Zec 9:13
כי דרכתי לי  יהודה  קשׁת מלאתי אפרים ועוררתי בניך ציון על בניך יון ושׂמתיך כחרב גבור׃
Zec 9:14
ויהוה עליהם יראה ויצא כברק חצו ואדני יהוה בשׁופר יתקע והלך בסערות תימן׃
Zec 9:15
יהוה צבאות יגן עליהם ואכלו וכבשׁו אבני  קלע ושׁתו המו כמו יין ומלאו כמזרק כזויות מזבח׃
Zec 9:16
והושׁיעם יהוה אלהיהם ביום ההוא כצאן עמו כי אבני  נזר מתנוססות על אדמתו׃
Zec 9:17
כי מה טובו ומה יפיו דגן בחורים ותירושׁ ינובב בתלות׃

GOTO NEXT CHAPTER - HEBREW & GREEK INDEX & SEARCH