PREVIOUS CHAPTER - NEXT CHAPTER - HELP - GR VIDEOS - GR YOUTUBE - TWITTER - SD1 YOUTUBE    

Gen 45:1
ולא יכל יוסף להתאפק לכל הנצבים עליו ויקרא הוציאו כל אישׁ מעלי ולא עמד אישׁ אתו בהתודע יוסף אל אחיו׃
Gen 45:2
ויתן את קלו בבכי וישׁמעו מצרים וישׁמע בית פרעה׃
Gen 45:3
ויאמר יוסף אל אחיו אני יוסף העוד אבי  חי  ולא  יכלו  אחיו  לענות  אתו  כי  נבהלו  מפניו׃
Gen 45:4
ויאמר יוסף אל אחיו גשׁו נא אלי ויגשׁו ויאמר אני יוסף אחיכם אשׁר מכרתם אתי מצרימה׃
Gen 45:5
ועתה אל תעצבו ואל יחר בעיניכם כי מכרתם אתי הנה כי למחיה שׁלחני אלהים לפניכם׃
Gen 45:6
כי זה שׁנתים הרעב בקרב הארץ ועוד חמשׁ שׁנים אשׁר אין חרישׁ וקציר׃
Gen 45:7
וישׁלחני אלהים לפניכם לשׂום לכם  שׁארית  בארץ  ולהחיות לכם  לפליטה  גדלה׃  
Gen 45:8
ועתה לא אתם שׁלחתם אתי הנה כי האלהים וישׂימני לאב  לפרעה  ולאדון לכל ביתו ומשׁל בכל ארץ מצרים׃
Gen 45:9
מהרו ועלו אל אבי  ואמרתם אליו כה אמר בנך יוסף שׂמני אלהים לאדון לכל מצרים רדה אלי אל תעמד׃
Gen 45:10
וישׁבת בארץ גשׁן והיית קרוב אלי אתה ובניך ובני בניך וצאנך ובקרך וכל אשׁר׃
Gen 45:11
וכלכלתי אתך שׁם כי עוד חמשׁ שׁנים רעב פן תורשׁ אתה וביתך וכל אשׁר׃
Gen 45:12
והנה עיניכם ראות ועיני אחי בנימין כי פי המדבר אליכם׃
Gen 45:13
והגדתם לאבי  את  כל  כבודי  במצרים ואת כל אשׁר ראיתם ומהרתם והורדתם את אבי  הנה׃  
Gen 45:14
ויפל על צוארי בנימן אחיו ויבך ובנימן בכה על צואריו׃
Gen 45:15
וינשׁק לכל אחיו ויבך עלהם ואחרי כן דברו אחיו אתו׃
Gen 45:16
והקל נשׁמע בית פרעה לאמר באו אחי יוסף וייטב בעיני פרעה ובעיני עבדיו׃
Gen 45:17
ויאמר פרעה אל יוסף אמר אל אחיך זאת עשׂו טענו את בעירכם ולכו באו ארצה כנען׃
Gen 45:18
וקחו את אביכם  ואת  בתיכם  ובאו  אלי  ואתנה  לכם  את  טוב  ארץ  מצרים  ואכלו  את  חלב  הארץ׃  
Gen 45:19
ואתה צויתה זאת עשׂו קחו לכם  מארץ  מצרים  עגלות  לטפכם  ולנשׁיכם ונשׂאתם את אביכם  ובאתם׃
Gen 45:20
ועינכם אל תחס על כליכם כי טוב כל ארץ מצרים לכם  הוא׃  
Gen 45:21
ויעשׂו כן בני ישׂראל ויתן להם  יוסף  עגלות  על  פי  פרעה  ויתן  להם  צדה לדרך׃
Gen 45:22
לכלם נתן לאישׁ חלפות שׂמלת ולבנימן נתן שׁלשׁ מאות כסף וחמשׁ חלפת שׂמלת׃
Gen 45:23
ולאביו  שׁלח  כזאת  עשׂרה  חמרים  נשׂאים מטוב מצרים ועשׂר אתנת נשׂאת בר ולחם ומזון לאביו  לדרך׃  
Gen 45:24
וישׁלח את אחיו וילכו ויאמר אלהם אל תרגזו בדרך׃
Gen 45:25
ויעלו ממצרים ויבאו ארץ כנען אל יעקב אביהם׃  
Gen 45:26
ויגדו לו  לאמר  עוד  יוסף  חי  וכי  הוא  משׁל  בכל  ארץ  מצרים  ויפג  לבו  כי  לא  האמין׃
Gen 45:27
וידברו אליו את כל דברי יוסף אשׁר דבר אלהם וירא את העגלות אשׁר שׁלח יוסף לשׂאת אתו ותחי רוח יעקב אביהם׃  
Gen 45:28
ויאמר ישׂראל רב עוד יוסף בני חי אלכה ואראנו בטרם אמות׃

GOTO NEXT CHAPTER - HEBREW & GREEK INDEX & SEARCH