PREVIOUS CHAPTER - NEXT CHAPTER - HELP - GR VIDEOS - GR YOUTUBE - TWITTER - SD1 YOUTUBE    

Gen 46:1
ויסע ישׂראל וכל אשׁר לו  ויבא  בארה  שׁבע ויזבח זבחים לאלהי אביו  יצחק׃  
Gen 46:2
ויאמר אלהים לישׂראל במראת הלילה ויאמר יעקב יעקב ויאמר הנני׃
Gen 46:3
ויאמר אנכי האל אלהי אביך  אל  תירא  מרדה  מצרימה כי לגוי גדול אשׂימך שׁם׃
Gen 46:4
אנכי ארד עמך מצרימה ואנכי אעלך גם עלה ויוסף ישׁית ידו על עיניך׃
Gen 46:5
ויקם יעקב מבאר  שׁבע  וישׂאו בני ישׂראל את יעקב אביהם  ואת  טפם  ואת  נשׁיהם בעגלות אשׁר שׁלח פרעה לשׂאת אתו׃
Gen 46:6
ויקחו את מקניהם ואת רכושׁם אשׁר רכשׁו בארץ כנען ויבאו מצרימה יעקב וכל זרעו אתו׃
Gen 46:7
בניו ובני בניו אתו בנתיו ובנות בניו וכל זרעו הביא אתו מצרימה׃
Gen 46:8
ואלה שׁמות בני ישׂראל הבאים מצרימה יעקב ובניו בכר יעקב ראובן׃
Gen 46:9
ובני ראובן חנוך ופלוא וחצרן וכרמי׃
Gen 46:10
ובני שׁמעון ימואל וימין ואהד ויכין וצחר ושׁאול בן הכנענית׃
Gen 46:11
ובני לוי גרשׁון קהת ומררי׃
Gen 46:12
ובני יהודה ער ואונן ושׁלה ופרץ וזרח וימת ער ואונן בארץ כנען ויהיו בני פרץ חצרן וחמול׃
Gen 46:13
ובני ישׂשכר תולע ופוה ויוב ושׁמרן׃
Gen 46:14
ובני זבלון סרד ואלון ויחלאל׃
Gen 46:15
אלה בני לאה אשׁר ילדה ליעקב בפדן  ארם  ואת  דינה  בתו  כל  נפשׁ  בניו  ובנותיו שׁלשׁים ושׁלשׁ׃
Gen 46:16
ובני גד צפיון וחגי שׁוני ואצבן ערי וארודי ואראלי׃
Gen 46:17
ובני אשׁר ימנה וישׁוה וישׁוי ובריעה ושׂרח אחתם ובני בריעה חבר ומלכיאל׃
Gen 46:18
אלה בני זלפה אשׁר נתן לבן ללאה בתו ותלד את אלה ליעקב שׁשׁ עשׂרה נפשׁ׃
Gen 46:19
בני רחל אשׁת יעקב יוסף ובנימן׃
Gen 46:20
ויולד ליוסף בארץ מצרים אשׁר ילדה לו  אסנת  בת  פוטי  פרע כהן אן את מנשׁה ואת אפרים׃
Gen 46:21
ובני בנימן בלע ובכר ואשׁבל גרא ונעמן אחי וראשׁ מפים וחפים וארד׃
Gen 46:22
אלה בני רחל אשׁר ילד ליעקב כל נפשׁ ארבעה עשׂר׃
Gen 46:23
ובני דן חשׁים׃
Gen 46:24
ובני נפתלי יחצאל וגוני ויצר ושׁלם׃
Gen 46:25
אלה בני בלהה אשׁר נתן לבן לרחל בתו ותלד את אלה ליעקב כל נפשׁ שׁבעה׃
Gen 46:26
כל הנפשׁ הבאה ליעקב מצרימה יצאי ירכו מלבד נשׁי בני יעקב כל נפשׁ שׁשׁים ושׁשׁ׃
Gen 46:27
ובני יוסף אשׁר ילד לו  במצרים  נפשׁ  שׁנים  כל  הנפשׁ  לבית  יעקב  הבאה  מצרימה שׁבעים׃
Gen 46:28
ואת יהודה שׁלח לפניו אל יוסף להורת לפניו גשׁנה ויבאו ארצה גשׁן׃
Gen 46:29
ויאסר יוסף מרכבתו ויעל לקראת ישׂראל אביו  גשׁנה  וירא  אליו  ויפל  על  צואריו ויבך על צואריו עוד׃
Gen 46:30
ויאמר ישׂראל אל יוסף אמותה הפעם אחרי ראותי את פניך כי עודך חי׃
Gen 46:31
ויאמר יוסף אל אחיו ואל בית אביו  אעלה  ואגידה לפרעה ואמרה אליו אחי ובית אבי  אשׁר  בארץ  כנען  באו  אלי׃  
Gen 46:32
והאנשׁים רעי צאן כי אנשׁי מקנה היו וצאנם ובקרם וכל אשׁר להם  הביאו׃  
Gen 46:33
והיה כי יקרא לכם  פרעה  ואמר  מה  מעשׂיכם׃
Gen 46:34
ואמרתם אנשׁי מקנה היו עבדיך מנעורינו ועד עתה גם אנחנו גם אבתינו  בעבור  תשׁבו  בארץ  גשׁן  כי  תועבת  מצרים  כל  רעה  צאן׃  

GOTO NEXT CHAPTER - HEBREW & GREEK INDEX & SEARCH