King James Bible Adam Clarke Bible Commentary Martin Luther's Writings Wesley's Sermons and Commentary Neurosemantics Audio / Video Bible Evolution Cruncher Creation Science Vincent New Testament Word Studies KJV Audio Bible Family videogames Christian author Godrules.NET Main Page Add to Favorites Godrules.NET Main Page

GREEK AND HEBREW BIBLE - DEUTERONOMY 17
PREVIOUS CHAPTER - NEXT CHAPTER - HELP - GR VIDEOS - GR YOUTUBE - TWITTER - SD1 YOUTUBE    



Deu 17:1
לא תזבח ליהוה אלהיך שׁור ושׂה אשׁר יהיה בו  מום  כל  דבר  רע  כי  תועבת  יהוה  אלהיך  הוא׃  
Deu 17:2
כי ימצא בקרבך באחד שׁעריך אשׁר יהוה אלהיך נתן לך  אישׁ  או  אשׁה  אשׁר  יעשׂה  את  הרע  בעיני  יהוה  אלהיך  לעבר  בריתו׃
Deu 17:3
וילך ויעבד אלהים אחרים וישׁתחו להם  ולשׁמשׁ  או  לירח  או  לכל  צבא  השׁמים אשׁר לא צויתי׃
Deu 17:4
והגד לך  ושׁמעת  ודרשׁת היטב והנה אמת נכון הדבר נעשׂתה התועבה הזאת בישׂראל׃
Deu 17:5
והוצאת את האישׁ ההוא או את האשׁה ההוא אשׁר עשׂו את הדבר הרע הזה אל שׁעריך את האישׁ או את האשׁה וסקלתם באבנים  ומתו׃  
Deu 17:6
על פי שׁנים עדים או שׁלשׁה עדים יומת המת לא יומת על פי עד אחד׃
Deu 17:7
יד העדים תהיה בו  בראשׁנה  להמיתו ויד כל העם באחרנה ובערת הרע מקרבך׃
Deu 17:8
כי יפלא ממך דבר למשׁפט בין דם לדם בין דין לדין ובין נגע לנגע דברי ריבת בשׁעריך וקמת ועלית אל המקום אשׁר יבחר יהוה אלהיך׃
Deu 17:9
ובאת אל הכהנים הלוים ואל השׁפט אשׁר יהיה בימים ההם ודרשׁת והגידו לך  את  דבר  המשׁפט׃
Deu 17:10
ועשׂית על פי הדבר אשׁר יגידו לך  מן  המקום  ההוא  אשׁר  יבחר  יהוה  ושׁמרת לעשׂות ככל אשׁר יורוך׃
Deu 17:11
על פי התורה אשׁר יורוך ועל המשׁפט אשׁר יאמרו לך  תעשׂה  לא  תסור  מן  הדבר  אשׁר  יגידו  לך  ימין ושׂמאל׃
Deu 17:12
והאישׁ אשׁר יעשׂה בזדון לבלתי שׁמע אל הכהן העמד לשׁרת שׁם את יהוה אלהיך או אל השׁפט ומת האישׁ ההוא ובערת הרע מישׂראל׃
Deu 17:13
וכל העם ישׁמעו ויראו ולא יזידון עוד׃
Deu 17:14
כי תבא אל הארץ אשׁר יהוה אלהיך נתן לך  וירשׁתה  וישׁבתה בה  ואמרת  אשׂימה עלי מלך ככל הגוים אשׁר סביבתי׃
Deu 17:15
שׂום תשׂים עליך מלך אשׁר יבחר יהוה אלהיך בו  מקרב  אחיך  תשׂים  עליך  מלך  לא  תוכל  לתת  עליך  אישׁ  נכרי  אשׁר  לא  אחיך  הוא׃  
Deu 17:16
רק לא ירבה לו  סוסים  ולא  ישׁיב  את  העם  מצרימה למען הרבות סוס ויהוה אמר לכם  לא  תספון  לשׁוב  בדרך  הזה  עוד׃  
Deu 17:17
ולא ירבה לו  נשׁים  ולא  יסור  לבבו  וכסף  וזהב  לא  ירבה  לו  מאד׃
Deu 17:18
והיה כשׁבתו על כסא ממלכתו וכתב לו  את  משׁנה  התורה  הזאת  על  ספר  מלפני  הכהנים הלוים׃
Deu 17:19
והיתה עמו וקרא בו  כל  ימי  חייו  למען  ילמד  ליראה  את  יהוה  אלהיו  לשׁמר  את  כל  דברי  התורה  הזאת  ואת  החקים  האלה  לעשׂתם׃
Deu 17:20
לבלתי רום לבבו מאחיו ולבלתי סור מן המצוה ימין ושׂמאול למען יאריך ימים על ממלכתו הוא ובניו בקרב ישׂראל׃

GOTO NEXT CHAPTER - HEBREW & GREEK INDEX & SEARCH

God Rules.NET
Search 30+ volumes of books at one time. Nave's Topical Bible Search Engine. Easton's Bible Dictionary Search Engine. Systematic Theology Search Engine.