PREVIOUS CHAPTER - NEXT CHAPTER - HELP - GR VIDEOS - GR YOUTUBE - TWITTER - SD1 YOUTUBE    

Job 1:1
אישׁ היה בארץ עוץ איוב שׁמו והיה האישׁ ההוא תם  וישׁר  וירא  אלהים  וסר  מרע׃  
Job 1:2
ויולדו לו  שׁבעה בנים ושׁלושׁ בנות׃
Job 1:3
ויהי מקנהו שׁבעת אלפי צאן ושׁלשׁת אלפי גמלים וחמשׁ מאות צמד בקר וחמשׁ מאות אתונות ועבדה רבה מאד ויהי האישׁ ההוא גדול מכל בני קדם׃
Job 1:4
והלכו בניו ועשׂו משׁתה בית אישׁ יומו ושׁלחו וקראו לשׁלשׁת אחיתיהם לאכל ולשׁתות עמהם׃
Job 1:5
ויהי כי  הקיפו  ימי  המשׁתה וישׁלח איוב ויקדשׁם והשׁכים בבקר והעלה עלות מספר כלם כי  אמר  איוב  אולי  חטאו  בני  וברכו  אלהים  בלבבם  ככה  יעשׂה  איוב  כל  הימים׃
Job 1:6
ויהי היום ויבאו בני האלהים להתיצב על  יהוה  ויבוא  גם  השׂטן בתוכם׃
Job 1:7
ויאמר יהוה אל  השׂטן  מאין  תבא  ויען  השׂטן  את  יהוה ויאמר משׁוט בארץ ומהתהלך׃
Job 1:8
ויאמר יהוה אל  השׂטן  השׂמת  לבך  על  עבדי איוב כי  אין  כמהו  בארץ  אישׁ  תם  וישׁר ירא אלהים וסר מרע׃
Job 1:9
ויען השׂטן את  יהוה  ויאמר  החנם  ירא  איוב  אלהים׃
Job 1:10
הלא את  שׂכת  בעדו  ובעד  ביתו  ובעד  כל  אשׁר לו  מסביב מעשׂה ידיו ברכת ומקנהו פרץ בארץ׃
Job 1:11
ואולם שׁלח נא  ידך  וגע  בכל  אשׁר  לו  אם  לא  על פניך יברכך׃
Job 1:12
ויאמר יהוה אל  השׂטן  הנה  כל  אשׁר לו  בידך רק  אליו  אל  תשׁלח ידך ויצא השׂטן מעם פני יהוה׃
Job 1:13
ויהי היום ובניו ובנתיו אכלים ושׁתים יין בבית אחיהם הבכור׃
Job 1:14
ומלאך בא  אל  איוב ויאמר הבקר היו חרשׁות והאתנות רעות על  ידיהם׃
Job 1:15
ותפל שׁבא ותקחם ואת הנערים הכו לפי חרב ואמלטה רק  אני  לבדי  להגיד׃
Job 1:16
עוד זה  מדבר  וזה  בא  ויאמר אשׁ אלהים נפלה מן  השׁמים ותבער בצאן ובנערים ותאכלם ואמלטה רק  אני  לבדי  להגיד׃
Job 1:17
עוד זה  מדבר  וזה  בא  ויאמר כשׂדים שׂמו שׁלשׁה ראשׁים ויפשׁטו על  הגמלים ויקחום ואת הנערים הכו לפי חרב ואמלטה רק  אני  לבדי  להגיד׃
Job 1:18
עד זה  מדבר  וזה  בא  ויאמר בניך ובנותיך אכלים ושׁתים יין בבית אחיהם הבכור׃
Job 1:19
והנה רוח גדולה באה מעבר המדבר ויגע בארבע פנות הבית ויפל על  הנערים וימותו ואמלטה רק  אני  לבדי  להגיד׃
Job 1:20
ויקם איוב ויקרע את  מעלו  ויגז  את  ראשׁו ויפל ארצה וישׁתחו׃
Job 1:21
ויאמר ערם יצתי מבטן אמי וערם אשׁוב שׁמה יהוה נתן ויהוה לקח יהי שׁם יהוה מברך׃
Job 1:22
בכל זאת לא  חטא  איוב  ולא  נתן  תפלה  לאלהים׃

GOTO NEXT CHAPTER - HEBREW & GREEK INDEX & SEARCH